Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 150 Hüküm no: 110 Orijinal metin no: [15b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un eşi Ahmed’den muhâlaa yoluyla boşandığı Muhâla‘a Mahmiye-i İstanbul’da Üsküblü mahallesinde sâkine olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Safiye bt. Mehmed nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu bâ‘isü’l-vesîka Ahmed b. Ahmed nâm kimesne mahzarında ikrâr ve takrîr-i kelâm edip mezbûr Ahmed zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh yirmi bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve mezbûr Ahmed’in firâşından hâsıl ve benden mütevellid bi-hakkı’l-hıdâne hâlâ hacr ve terbiyemde olan sadrî oğlum Hüseyin nâm sagīri yedi yaşını tekmîl edinceye değin kendi mâlımdan infâk ve iksâ edip me’ûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Muharremi’l-harâm sene 1153. Şuhûdü’l-hâl: el-Hâc Hüseyin b. Osman, Mehmed b. İbrahim, Ali b. Halil, Hasan b. Mustafa, Mehmed b. İbrahim, el-Hâc Süleyman b. Abdullah, İsmail b. Hacı Mustafa