Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 151 Hüküm no: 111 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Ahmed Efendi ve hanımı Zeyneb’in vakıf parasıyla aldıkları evin borcunu ödeme konusunda Mustafa Efendi’yi vekil tayin ettikleri Vekâlet-i devriye <> Mahmiye-i İstanbul’da Koca Mustafa Paşa Câmi‘-i şerîfi kurbünde Ali Fakıh mahallesinde sâkin kendiden asîl ve zevce-i menkûhası Zeyneb bt. Abdullah b. Abdülhalik tarafından zikri âtî husûsa vekîl olduğu ber-nehc-i şer‘î sâbit olan a‘mâ Derviş eş-Şeyh Ahmed Efendi b. Osman b. Receb nâm kimesne meclis-i şer‘-i hatîr-ı lâzımü’t-tevkīrde mahmiye-i merkūmede Kâtibkasım Mescid-i şerîfi müezzini olan sâhib-i hâzihi’l-vesîka Müezzinzâde Mehmed Efendi b. el-Hâc İbrahim nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip bundan akdem işbu iki kıt‘a mümzâ ve mahtûm ve bin yüz elli bir senesi Saferi’l-hayrın gurresi târîhiyle müverraha temessüklerim mantûkunca mezbûr el-Hâc İbrahim hayâtında kāimmakām-ı mütevellî olduğu mescid-i mezbûrun nukūd-ı mevkūfesinden bize yüz otuz guruşu idâne ve teslîm ben dahi ba‘de’l-istidâne ve’t-tesellüm meblağ-ı mezbûr mukābelesinde merhûm Sipâhi Dede nâm sâhibü’l-hayrın vakfı musakkafâtından beher şehr on beş akçe icâre-i müeccele ile zevcem müvekkilem mezbûre Zeyneb Hatun ile ale’l-iştirâk taht-ı tasarrufumuzda olup mahalle-i mezbûrede vâki‘ bir tarafdan Kullukçu Mustafa menzili ve bir tarafdan Kadı Ahmed Efendi menzili ve bir tarafdan Asiye Hatun menzili ve taraf-ı râbi‘i tarîk-i âm ile mahdûd hâriciye ve dâhiliyesinde fevkānî ve tahtânî dört bâb oda ve dehliz ve matbah ve bi’r-i mâ ve kenîf ve ahur ve eşcâr-ı müsmire ve gayr-ı müsmireli bahçeyi müştemil vakıf menzilimizi bâ-ma‘rifet-i mütevellî-yi vakf mezbûr el-Hâc İbrahim’e ferâğ ve tefvîz ol dahi ber-vech-i muharrer tefevvüz ve kabûl ettikden sonra mezbûr el-Hâc İbrahim vefât edip menzil-i mezkûr sulbî oğlu merkūm Mehmed Efendi’ye intikāl-i âdî ile intikāl etmiş idi, lâkin ferâğ-ı mezbûr hakīkatde rehin ve mablağ-ı mezbûr yüz otuz guruş merkūm Mehmed Efendi’nin kāimmakām-ı mütevellî olduğu vakf-ı mezbûra zimmetimizde edâsı lâzım deynim olmağla merkūm Mehmed Efendi meblağ-ı mezbûr yüz otuz guruşu târîh-i vesîkadan altmış bir gün tamâmında edâ etmek üzere bi’t-taleb bizi tecîl ettikde biz dahi kabûl ve meblağ-ı mezbûru ecel-i mezkûr hulûlünde edâya ta‘ahhüd ve iltizâm eylediğimizden sonra meblağ-ı mezbûr yüz otuz guruşu müddet-i merkūm tamâmında edâ edemezsek menzil-i mahdûd-ı mezkûru bedel-i misli ve ma‘rifet-i mütevellî ile âhara ferâğa ve kabz-ı bedele ve bedelinden meblağ-ı mezbûr yüz otuz guruşu merkūm Mehmed Efendi’ye ve fazla kalır ise bize teslîme ve bunlar tavakkuf eylediği umûrun küllîsine akd-i rehinde meşrûta ve azl ü in‘izâlden masûne vekâlet-i devriye ile tarafımızdan işbu hâzır bi’l-meclis Mustafa Efendi’yi asâleten ve vekâleten vekîl nâib-i menâb nasb u ta‘yîn eylediğimde ol dahi vekâlet-i merkūmeyi kabûl ve hizmet-i lâzımesini edâya ta‘ahhüd ve iltizâm eyledik dedikde mezbûrân Mehmed Efendi ve İmâm Mustafa Efendi mukırr-ı mezbûr a‘mâ Derviş eş-Şeyh Ahmed Efendi’yi cemî‘ takrîr-i meşrûhunda tahkīk ve tasdîk etmeleriyle mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm sene 1153. Şuhûdü’l-hâl: Mehmed Ağa b. Mustafa, Ahmed Çelebi b. Şa‘bân, Abdullah Çelebi b. Mehmed, İmâmzâde Mustafa Çelebi b. Mehmed, Hüseyin Ağa b. Ahmed, Mustafa Çelebi b. Mehmed, Mehmed Ağa b. Abdullah