Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 153 Hüküm no: 113 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah b. Ahmed ile kendisini yaralayan Mustafa Çelebi’nin oğlu Mehmed arasındaki davaya sulh bedeli karşılığı son verildiği Bi-imzâ-i efendi Sulh Mahmiye-i İstanbul’da Salih Paşa mahallesinde sâkin on beş yaşında ve bülûğuna mu‘terif ve cüssesinin dahi bülûğa tahammülü ve bülûğuna hükm-i şer‘î lâhık olan Feyzullah b. Ahmed b. Abdullah nâm kimesne meclis-i şer‘-i şerîf-i enverde sâhib-i hâzihi’l-vesîka Sarraczâde Mustafa Çelebi b. el-Hâc Mehmed nâm kimesne mahzarında ikrâr-ı tâm ve takrîr-i kelâm edip işbu târîh-i kitâbdan bir gün mukaddem kuşluk vaktinde mahmiye-i mezbûrede Azebler mahallesinde tarîk-i âmda mezbûr Mustafa Çelebi’nin sulbî oğlu Mehmed nâm sagīr bi-gayr-ı hakkın amden kalemtıraş ile sağ kasığımın üst tarafına bir yerden darb ve mu‘âyene olunan vech üzere cerh eyledi deyü da‘vâ eylediğimde ba‘de vukū‘i’l-münâza‘a beynimizde muslihûn tavassut edip da‘vâ-yı mezkûremden beni mezbûr Mustafa Çelebi ile an-inkâr yirmi beş guruş üzerine sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı merkūm yirmi beş guruş merkūm Mustafa Çelebi’nin kendi mâlından olmak üzere yedinden bi’t-tamâm ahz u kabz edip cerh-i mezkûra ve mâ-yahdüsü minhe müte‘allıka âmme-i de‘âvî ve kâffe-i mutâlebâtdan sagīr-i mezbûr Mehmed’in ve babası merkūm Mustafa Çelebi’nin zimmetini ve vâlidesi gāibetü ani’l-meclis Saliha bt. Abdullah’ın zimmetlerini ibrâ ve ıskāt eyledim min-ba‘d merkūmûn ile aslâ ve kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm sene 1153. Şuhûdü’l-hâl: el-Hâc Hasan Ağa b. Hacı İbrahim, Hacı Ömer b. Mustafa, es-Seyyid el-Hâc Süleyman b. eş-Şeyh Ali, Lütfullah Ağa b. Hacı Abdullah, el-Hâc Süleyman b. Hacı Hasan, el-Hâc Ali b. Mehmed, Osman Beşe b. Mustafa, Halil Ağa b. İbrahim, es-Seyyid Ali Çelebi b. Hacı Mehmed, Nimetullah Çelebi b. Hacı Süleyman