Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 313 Hüküm no: 451 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden el-Hâc Mehmed’den vârislerine kalan kölenin kitâbetle âzat edildiği Dergâh-ı âlî yeniçerilerinden Ebûbekir Beşe b. Mehmed asâleten ve li-ebeveyn karındaşı Bayram tarafından ikrâr-ı âti’l-beyâna vekîl-i sâbitü’l-vekâlesi olmağın vekâleten ve âhar karındaşı İbrahim nâm sagīrin tesviye-i umûruna kıbel-i şer‘den mansûb vasîsi olan Gazanfer Beşe b. Receb vesâyeten mahfil-i kazâda merkūmun babaları mezbûr el-Hâc Mehmed’den irs-i şer‘le intikāl edip rıkkına mu‘terif olan orta boylu, sarı sakallı, açık kaşlı, elâ gözlü, Rusiyyü’l-asl râfi‘u hâze’l-kitâb Rıdvan b. Abdullah mahzarında herbiri ikrâr-ı tâm ve takrîr-i kelâm edip mevsûf-ı mezbûrun semen-i misli ile kitâbete kesmek sagīr-i mezbûr hakkında dahi enfa‘ ve evlâ ve elyak ve ahrâ olduğu mukarrer olmağla on dört bin akçeye kitâbete kesip ol dahi kabûl eylemişdir. Hâlâ meblağ-ı mezbûr on dört bin akçeyi mevsûf-ı mezbûrun yedinden bi’t-tamam ve’l-kemâl ahz u kabz eyledik ba‘de’l-yevm mevsûf-ı mezbûr Rıdvan sâir harâir-i asliyyîn gibi hür olsun, üzerinde velâdan gayrı bir şey hakkımız kalmadı dediklerinde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-âşir min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Mehmed Efendi b. Mustafa el-imâm, Ali Efendi b. Mehmed el-müezzin, Musa Beşe tüfenkçi, Hacı Mehmed b. Musa, Ömer Beşe b. Abdullah ve gayruhum.