Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 154 Hüküm no: 115 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi ile ortağı Yani’nin Abdulkadir Efendi’yi vekil tayin ettikleri Vekâlet Medîne-i Halebü’ş-şehbâ ahâlîsinden olup mahmiye-i İstanbul’da Vâlide Hanı’nda ticâret vechi üzere sâkin Abdullah Çelebi b. Esad b. Ma‘tuf nâm kimesne ile şerîki Yani v. Kostantin v. Yani nâm zimmî meclis-i şer‘-i hatîr-ı lâzımü’t-tevkīrde yine medîne-i mezbûre ahâlîsinden fahrü’l-müderrisîni’l-kirâm sâhib-i hâzihi’l-vesîka Abdulkadir Efendi b. Abdüllatif nâm kimesne mahzarında ikrâr-ı tâm ve takrîr-i kelâm edip mahrûse-i Edirne mütemekkinlerinden olup yine tüccâr tâifesinden Yakin ve er karındaşı Hayim nâm Yahûdiler zimmetlerinde işbu yedimizde olan temessük mantûkunca cihet-i deyn-i şer‘îden dört bin yüz guruş hakkımız olmağla meblağ-ı mezbûr dört bin yüz guruşu mesfûrândan taleb ve da‘vâ ve ahz u kabza ve lede’l-iktizâ sulh ve ibrâya ve bize îsâl ve teslîme ve bunlar mütevakkıf olduğu umûrun küllîsine tarafımızdan mûmâ-ileyh Abdulkadir Efendi’yi vekîl ve nâib-i menâb nasb u ta‘yîn ettiğimizde mûmâ-ileyh dahi ber-vech-i muharrer vekâlet-i mezbûreyi kabûl ve hıdemât-ı lâzımesini mahallinde edâya ta‘ahhüd ve iltizâm eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Muharremi’l-harâm sene 1153.