Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 159 Hüküm no: 121 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin fırıncı aletlerini İsmail Çelebi’ye sattığı El-emru hasbemâ hurrire fîhi nemakahû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- Mübâya‘a Mahmiye-i İstanbul’da (°) mahallesinde sâkin es-Seyyid Hasan Çelebi b. Ömer nâm kimesne meclis-i şer‘-i şerîf-i enverde işbu râfi‘ü’l-kitâb el-Hâc İsmail Çelebi b. el-Hâc İbrahim nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin mahmiye-i mezbûrede Kadırga Limanı Meydanı’nda sagīr somuncu fırını derûnunda fırıncı âlâtından iki hamîr teknesi ve bir kazgan ve yirmi beş ...? ve yirmi beş sagīr fota ve bir çekmece ve dört kürek ve on iki sopamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin mezbûr el-Hâc İsmail Çelebi’ye üç yüz elli guruşa bey‘ ü temlîk eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz elli guruşu mezbûr el-Hâc İsmail Çelebi yedinden tamâmen ahz u kabz eyledim ba‘de’l-yevm âlât-ı muharrere-i mezkûrede benim kat‘an alâka ve medhalim kalmayıp mezbûr el-Hâc İsmail Çelebi’nin mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene isneyn ve hamsîn ve mi’e ve elf. Şuhûdü’l-hâl: Kethüdâ Mehmed Ağa, Yiğitbaşı Ömer Çelebi b. (°), İbrahim Ağa b. (°), Emin Mehmed Ağa b. (°), el-Hâc Hasan Ağa b. (°), İsmail Çelebi b. (°), Molla Sunullah b. (°), es-Seyyid Ebubekir Çelebi b. (°), es-Seyyid Musa b. (°), Mustafa Çavuş b. (°), Hasan Usta b. (°)