Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 160 Hüküm no: 122 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden Mehmed Ali’de alacağı olduğu A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fazl ve’l-me‘âlî metbû‘ü’l-efâzıl ve’l-e‘âlî fazîletli semâhetli âtıfetli Kırımî Mehmed Efendi hazretlerinin def‘a-i sâniyelerinde olan vekāyi‘ sicilleridir. Fi’l-yevmi’l-âşir min-Muharerremi’l-harâm li-sene selâse ve hamsîn ve mi’e ve elf. İsbât-ı verâset Vilâyet-i Anadolu’da medîne-i Edirne’de menzilci iken bundan akdem katîlen vefât eden Mehmed Ali b. Abdullah b. Abdurrahman’ın oğlu ve vârisi olduğunu iddi‘â eden bâ‘isü’l-vesîka Ali nâm kimesne meclis-i şer‘-i hatîr-ı lâzımü’t-tevkīrde Mustafa b. Abdülmümin nâm kimesne muvâcehesinde üzerine da‘vâ ve takrîr-i kelâm edip ben maktûl-i mezbûr Mehmed Ali’nin firâşından hâsıl ve mahmiye-i İstanbul’da Seferikoz mahallesi sâkinelerinden zevce-i menkûha-i metrûkesi Âişe bt. Mehmed nâm hatundan mütevellid sulbî oğlu olup verâseti bana ve medîne-i mezbûrede sâkinler olan veresesine münhasıra olmağla maktûl-i mezbûrun merkūm Mustafa zimmetinde cihet-i karzdan on guruş hakkı olup kable’l-ahz ve’l-istîfâ katîlen vefât etmekle meblağ-ı mezbûru merkūm Mustafa’dan bi’l-verâse taleb ederim suâl olunsun dedikde gıbbe’s-suâl merkūm Mustafa cevâbında maktûl-i mezbûra cihet-i merkūmeden zimmetinde on guruş deyni olduğunu ikrâr lâkin müdde‘î-i mezbûrun oğlu vârisi olduğu ma‘lûmum değildir deyü inkâr edicek müdde‘î-i mezbûr Ali’den ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden olup mahmiye-i mezbûrede Yenibahçe kurbünde Keçeciler mahallesi ahâlîsinden Mehmed Çelebi b. Mehmed ve Mehmed Beşe b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu Ali vilâyet-i Anadolu’da medîne-i Edi[r]ne’de menzilci iken bundan akdem katîlen vefât eden Mehmed Ali b. Abdullah b. Abdurrahman’ın firâşından hâsıl ve mahmiye-i İstanbul’da Seferikoz mahallesi sâkinelerinden zevce-i menkûha-i metrûkesi Âişe bt. Mehmed nâm hatundan mütevellid sulbî oğludur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Muharremi’l-harâm sene 1153. Şuhûdü’l-hâl: Salih Çelebi b. Süleyman, Mehmed Çelebi b. Abdullah, Mehmed Çelebi b. Mehmed, Mehmed Beşe b. Ahmed, Hüseyin b. el-Hâc Mehmed du‘âcı