Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 161 Hüküm no: 123 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. İshak’ın istiğlâl yoluyla Mehmed Ağa’dan borç aldığı İstiğlâl Mahmiye-i İstanbul’da Nuri Dede mahallesi ahâlîsinden el-Hâc İbrahim b. İshak nâm kimesne meclis-i şer‘-i hatîr-ı lâzımü’t-tevkīrde Dergâh-ı âlî yeniçerilerinin sekizinci cemâ‘atine mahsûs odanın mühimmâtına mevkūfe nukūdun mütevellîsi olan bâ‘is-i hâzihi’l-vesîka Mehmed Ağa b. Mehmed muvâcehesinde ikrâr-ı tâm ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan zevcem Emetullah’ın dâhiliye ta‘bîr olunur mülkü ve bir tarafdan Rukiye Hatun mülkü ve bir tarafdan Abdullah Çavuş zevcesi mülkü ve bir tarafdan tarîk-i âm ile mahdûd fevkānî iki bâb oda ve dehliz ve iki kilâr ve tahtında kenîf ve bi’r-i mâ ve ahur ve havluyu müştemil hâriciye ta‘bîr olunur mülk menzilimi tarafeynden îcâb ve kabûlü hâvî bi-tarîkı’l-istiğlâl mütevellî-yi merkūm Mehmed Ağa’ya beş yüz guruşa bey‘ ve teslîm eylediğimde ol dahi bi’t-tevliye nukūd-ı mevkūfe ile iştirâ ve tesellüm ve kabz ve kabûl edip semen-i mebî‘-i mezbûr beş yüz guruşu mâl-ı vakf-ı mezbûrdan olmak üzere mütevellî-yi merkūm yedinden ahz u kabz ve tesellüm eylediğimden sonra menzil-i mahdûd-ı mezkûru târîh-i vesîkadan gıbbe’t-tahliye ve’t-tekābüz iki sene tamâmına değin beher şehr yetmiş beş guruşdan cem‘an yüz elli guruşa bi’t-tevliye bana îcâr ve teslîm ettikde ben dahi ber-vech-i muharrer istîcâr ve kabûl eyledim dedikde [ba‘de]’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Muharremi’l-harâm sene 1153. Şuhûdü’l-hâl: el-Hâc Musa Ağa b. Abdullah, Nâzır el-Hâc Mehmed Odabaşı, Ahmed Ağa b. Halil, Belgradî Hacı Mehmed, Hasan b. Mehmed, İbrahim Ağa b. Ömer, el-Hâc Mehmed b. Ömer, Emir Mehmed b. Mehmed, Mahmud Ağa b. Mustafa, Mustafa b. Ali