Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 161 Hüküm no: 124 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Veli Beşe’nin Hüseyin Beşe’yi vekil tayini Vekâlet Dârü’s-saltanati’l-aliyye Kostantıniyyetü’l-mahmiyede Çıkrıkçı Kemâl mahallesinde sâkin Çuka[dâr] Veli Beşe b. İbrahim nâm kimesne meclis-i şer‘-i hatîr-ı lâzımü’t-tevkīrde hâmilü’l-vesîka Hüseyin Beşe b. Ömer nâm kimesne mahzarında muvâcehesinde ikrâr-ı tâm ve takrîr-i kelâm edip vilâyet-i Anadolu’da Küretünnühas kazâsı nevâhîsinden Ağılı nâhiyesine tâbi‘ Arslan nâm karyede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilimi ve ma‘lûmü’l-hudûd ve’l-kıta‘ tarlalarımı semen-i misliyle ve bedel-i misli ve sâhib-i arz ma‘rifetiyle âhara bey‘ ve ferâğa ve kabz-ı semen ve bedele ve bana îsâl ve teslîme ve bunlar tevakkuf eylediği umûrun küllîsine tarafımdan merkūm Hüseyin Beşe’yi vekîl ve nâib-i menâb nasb u ta‘yîn eylediğimde ol dahi vekâlet-i merkūmeyi kabûl ve hıdemât-ı lâzımesini mahallinde edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Muharremi’l-harâm sene 1153. Şuhûdü’l-hâl: Musa Beşe b. Mehmed, İsmail b. Receb, Mehmed Çelebi b. Abdullah, İvaz Çelebi b. Abdullah, Mustafa b. el-Hâc Mehmed muhzır