Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 162 Hüküm no: 125 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mataracı Mehmed Ağa’nın varislerinin kendilerine kalan evi sattıkları Mübâya‘a-i menzil Mahmiye-i İstanbul’da Gül Câmi‘-i şerîfi kurbünde Sinan Paşa mahallesi ahâlîsinden olup medîne-i Bağdad’da müsâfiren sâkin iken bundan akdem vefât eden Mataracı Mehmed Ağa b. Cafer b. Abdurrahman’ın verâseti zevce-i menkûha-i metrûkesi Saliha bt. Mustafa nâm hatun ile sulbî sagīr oğlu Mehmed ve sulbiye kebîre kızı Fâtıma’ya münhasıra ve tashîh-i meselesi yirmi dört sehmden olup sihâm-ı mezkûreden üç sehmi zevce-i mezbûre Saliha Hatun’a ve on dört sehmi oğlu sagīr-i merkūm Mehmed’e ve yedi sehmi kızı mezbûre Fâtıma’ya isâbeti tahakkukundan sonra sagīr-i mezbûr Mehmed’in tesviye-i emrine bâ-hüccet-i şer‘iyye vasiyy-i muhtârı olup ve mezbûretân Saliha ve Fâtıma taraflarından husûs-ı âti’z-zikre vekîl olduğu ber-nehc-i şer‘î sâbit olan el-Hâc Abdullah Odabaşı b. İbrahim nâm kimesne meclis-i şer‘-i hatîr-ı lâzımü’t-tevkīrde işbu bâ‘isetü’l-kitâb Âişe bt. Kenan nâm hatun mahzarında bi’l-vekâle ve bi’l-vesâye ikrâr-ı tâm ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı olup ba‘de vefâtihî bi’l-ırsi’ş-şer‘î sagīr-i mezbûr ile müvekkiletân-ı mezbûretâna isâbet ve intikāl eden mesbûku’z-zikr Sinan Paşa mahallesinde vâki‘ bir tarafdan Sinan Paşa Mescid-i şerîfi ve bir tarafdan şeyhülislâm-ı esbak merhûm İsmail Efendi Vakfı’ndan olan menzil ve bir tarafdan Çukadâr el-Hâc Halil menzili ve taraf-ı râbi‘i tarîk-i hâs ile mahdûd fevkānî iki bâb oda ve bir sofa ve tahtânî bir matbah ve bir kenîf ve bir mikdâr havluyu müştemil menzilden müvekkiletân-ı mezbûretân Saliha ve Fâtıma hatunlar tashîh-i mezkûr üzere on sehm hisselerini âhara bey‘ murâd etmeleriyle sagīr-i mezbûr Mehmed’in on dört sehm hissesi kābil-i taksîm olmayıp ve hâsılı harcına dahi vefâ etmemeğin sagīr-i mezbûrun hissesi mezbûretânın hisseleriyle ma‘an semen-i misliyle âhara bey‘ ve semen-i mezbûr istirbâh olunup hâsıl olan nemâsıyla sagīr-i mezbûr Mehmed infâk ve iksâ olunmak her vechile hakkında enfa‘ ve evlâ olduğu lede’ş-şer‘i’l-enver zâhir ve mütehakkık olduğuna binâen kıbel-i şer‘-i kavîmden vech-i muharrer üzere me’zûn olmağla menzil-i mahdûd-ı mezkûrun on dört sehm hissesini vesâyeten ve on sehm hissesini dahi vekâleten tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Âişe Hatun’a iki yüz elli guruşa bi’l-vekâle ve bi’l-vesâye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz elli guruşu mezbûre Âişe Hatun yedinden bi’l-vekâle ve bi’l-vesâye tamâmen ahz u kabz eyledim ba‘de’l-yevm menzil-i mahdûd-ı mezkûrda müvekkiletân-ı mezbûretân Saliha ve Fâtıma nâm hatunlar ile sagīr-i merkūm Mehmed’in kat‘an alâka ve medhalleri kalmayıp mezbûre Âişe Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Muharremi’l-harâm sene 1153. Şuhûdü’l-hâl: el-Hâc Abdülkerim Efendi b. Mahmud, Müezzin Osman Efendi b. Abdülbaki, Mahmud Efendi b. Mustafa, Mehmed Abdullah b. Osman, Mehmed Odabaşı b. Hasan, İsmail b. Mehmed Odabaşı, Molla Ahmed b. Halil, Ahmed Beşe b. Mehmed