Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 163 Hüküm no: 126 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Odabaşı’nın hayatta istiğlâl yoluyla aldığı borcunu terekeden vakfa ödediği Fekk-i rehin Dergâh-ı âlî -dâme mahfûfen bi’l-me‘âlî- yeniçerilerinin üçüncü bölüğe mahsûs oda neferâtının mühimmâtlarına mevkūfe nukūdun bi’l-fi‘il mütevellîsi olan Mehmed Odabaşı b. Hasan nâm kimesne meclis-i şer‘-i hatîr-ı lâzımü’t-tevkīrde mahmiye-i İstanbul’da Gül Câmi‘-i şerîfi kurbünde Sinan Paşa Mescid-i şerîfi mahallesi ahâlîsinden olup bundan akdem medîne-i Bağdad’da vefât eden Mataracı Mehmed Ağa b. Cafer b. Abdurrahman’ın verâseti zevce-i menkûha-i metrûkesi Saliha bt. Mustafa nâm hatun ile sulbî sagīr oğlu Mehmed ve sulbiye kebîre kızı Fâtıma’ya münhasıra olmağla mezbûre Saliha Hatun ve Fâtıma Hatun taraflarından zikri âtî husûsu tasdîka nehc-i şer‘î üzere vekîl ve sagīr-i mezbûr Mehmed’in tesviye-i umûruna ber-mûceb-i hüccet-i şer‘iyye vasiyy-i muhtârı olan el-Hâc Abdullah Odabaşı b. İbrahim mahzarında bi’l-veliyye ikrâr ve takrîr-i kelâm edip bin yüz kırk altı Ramazanı’nın üçüncü günü müteveffâ-yı mezbûr Mataracı Mehmed Ağa hayâtında zikr olunan Sinan Paşa mahallesinde vâki‘ bir tarafdan ba‘zan mescid-i mezbûr ve ba‘zan şeyhülislâm-ı sâbık merhûm İsmail Efendi Vakfı’ndan olan menzil ve bir tarafdan Çukadâr el-Hâc Halil ve bir tarafdan Gümrük Emîni Çukadârı Hacı Ali ve ba‘zan Rukiye Hatun menzilleri ve taraf-ı râbi‘i tarîk-i hâs ile mahdûd dâhiliye ve hâriciyeli ma‘lûmü’l-müştemilât mülk menzilini bi-tarîkı’l-istiğlâl üç yüz guruşu mâl-ı vakf-ı mezbûrdan olmak üzere müteveffâ-yı mezbûr Mehmed Ağa yedimden ahz u kabz eylediğinden sonra gıbbe’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan mahdûd-ı mezkûru iki sene tamâmına değin beher senesi kırk beş guruşdan cem‘an doksan guruşa müteveffâ-yı mezbûr Mehmed Ağa’ya hayâtında bi’t-tevliye îcâr ve teslîm eylediğimde ol dahi ber-vech-i muharrer istîcâr ve kabûl etmiş idi, hâlâ meblağ-ı mezbûr üç yüz guruş ile icâre-i mezkûreden müctemi‘ doksan guruş ki cem‘an üç yüz doksan guruşu tereke-i müteveffâ-yı mezbûrdan olmak üzere mezbûr el-Hâc Abdullah Odabaşı vesâyeten ve vekâleten bana edâ ve teslîm ben dahi yedinden bi’t-tevliye tamâmen ahz u kabz edip ve menzil-i mahdûd-ı mezkûru rehinden fek ve ihrâc eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Muharremi’l-harâm sene 1153. Şuhûdü’l-hâl: Eş-şâhidûnü’s-sâbikūn