Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 164 Hüküm no: 127 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emine’den Hasan ve Ayşe’ye kalan vakıf evin arsasının da kendilerine tevcihi Tevcîh-i arsa Mahmiye-i İstanbul’da Koğacı Dede mahallesinde sâkine iken bundan akdem vefât eden Emine bt. Hüseyin b. Abdullah’ın verâseti sadrî kebîr oğlu Hasan ve sadriye kebîre kızı Âişe’ye münhasıra olduğu lede’ş-şer‘i’l-enver zâhir ve mütehakkık oldukdan sonra kendi tarafından asîl ve kız karındaşı mezbûre Âişe tarafından ber-nehc-i şer‘î vekâleti sabit olan işbu bâ‘isü’l-vesîka mezbûr Hasan meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip arsası ashâb-ı hayrâtdan merhûme Hadîce bt. Yusuf nâm sâhibetü’l-hayrın yevmî üçer İhlâs-ı şerîf ve bir Fâtihatü’l-kitâb tilâvet etmek üzere sulehâ ve sulehâta meşrûta vakfı olmağla mûrisimiz müteveffât-ı mezbûrenin tevcîh-i hâkimü’ş-şer‘le tasarrufunda ve ebniyesi ile’l-vefât yedinde mülk ve hakkı olup mahalle-i mezbûrede vâki‘ bir tarafı Molla Mustafa mülkü ve bir tarafı es-Seyyid Ahmed Çelebi menzili ve tarafeyni tarîk-i hâs ile mahdûd bir bâb fevkānî oda ve iki bâb tahtânî oda ve bir sofa ve havluyu müştemil menzilin ebniye-i mezkûresi bi’l-ırsi’ş-şer‘î bize intikāl etmeğin husûs-ı mezkûra vukūf-ı tâmmı olan işbu hâzırûn bi’l-meclis Müslimînden ba‘de’l-istihbâr arsası kıbel-i şer‘den bize tevcîh olunmak bi’l-asâle ve bi’l-vekâle matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi arsa-i mahdûd-ı mezkûru ber-mûceb-i şart-ı vâkıfe müvekkile-i mezbûre Âişe ile mezbûr Hasan’a tevcîh buyurup işbu vesîka-i enîka bi’t-taleb ketb olundu. Fi’l-yevmi’l-hâdî aşer min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: Fahrü’l-kuzâti’l-kirâm Mehmed Efendi b. Osman Efendi, Mütevellî Ali Ağa b. Osman Çelebi, Bayrakdâr Mehmed Ağa b. Mustafa, Musa Çelebi b. Abdurrahman, Musa Beşe b. Osman, Molla Hasan b. Yusuf