Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 165 Hüküm no: 128 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in evini Feyzullah Efendi’ye sattığı (bey’ bi’l-vefâ) Bey‘ bi’l-vefâ El-emru hasbemâ hurrire fîhi nemekahû el-fakīr ileyhi azze şânühû Abdullah el-kādı bi-medîneti Kostantıniyye el-mahmiye -Gufira lehû- Mahmiye-i İstanbul’da Mimârayas mahallesinde sâkin el-Hâc Mehmed Bey b. Abdülbaki Efendi b. Yakub nâm kimesne meclis-i şer‘-i şerîf-i enverde merhûm Mahmud Çavuş Vakfı’na evlâdiyet ve meşrûtiyet üzere mütevellî olan sâhib-i hâzihi’l-vesîka Feyzullah Efendi b. İbrahim nâm kimesne mahzarında ikrâr-ı tâm ve takrîr-i kelâm edip yedimde mülküm olup zikr olunan Mimârayas mahallesinde vâki‘ bir tarafdan Keresteci el-Hâc Mehmed mülkü ve bir tarafdan Keresteci es-Seyyid el-Hâc Hasan mülkü ve iki tarafdan tarîk-i hâs ile mahdûd dâhiliyesinde fevkānî üç bâb oda ve iki sofa ve bir tahte’s-semâ ve tahtânî bir oda ve kilâr ve bir matbah ve bi’r-i mâ ve hâriciyesinde fevkānî üç bâb oda ve bir sofa ve tahtında bir ahur ve havlu ve kanavâtına teb‘iyet ile mülk olan bir masura mâ-i lezîz-i cârîyi müştemil menzilim ile mukābilinde vâki‘ ma‘lûmü’l-hudûd iki yüz yetmiş zirâ‘ muhterik mülk menzil arsamı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık işbu târîh-i vesîkadan altı [ay] tamâmına dek iki bin dört yüz elli altı guruşa bi-tarîkı’l-vefâ mûmâ-ileyh Feyzullah Efendi’ye bey‘ ve teslîm eylediğimde ol dahi ber-vech-i mübeyyen tarîk-i mezkûr üzere bi’t-tevliye iştirâ ve tesellüm ve kabûl ve semeni olan meblağ-ı mezbûr iki bin dört yüz elli altı guruşu mâl-ı vakf-ı mezbûrdan bana def‘ ü teslîm eylediğinde ben dahi yedinden bi’t-tamâm tesellüm ve ahz u kabz eyledim dedikde gıbbe’t-tasdîkı’ş-şer‘î mezbûr el-Hâc Mehmed Bey meclis-i mezkûrda i‘âde-i kelâm edip akd-i mezkûr hakīkatde bey‘ olmayıp meblağ-ı mezbûr iki bin dört yüz elli altı guruş zimmetimde deyn ve mukābelesinde mebî‘-i mezkûr rehin olmağın müddet-i mezkûre tamâmında edâ-i deyn müyesser olmazsa zikr olunan menzil ve arsayı semen-i misliyle bey‘ ve semenini kabz ve semen-i mezkûrdan meblağ-ı mezbûr iki bin dört yüz elli altı guruşu edâ ve fazla kalır ise bana îsâle ve bunlar mütevakkıf olduğu umûrun küllîsine küllemâ aziltüke fe-ente vekîlî mazmûnu üzere azl ü in‘izâlden masûn ve sulb-i akd-i rehinde meşrûta ve vekâlet-i devriye-i sahîha-i şer‘iyye ile tarafımdan işbu hâzır bi’l-meclis fahrü’l-müderrisîni’l-kirâm Mehmed Efendi b. el-Hâc Ali’yi vekîl ve nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-Muharremi’l-harâm sene 1153. Şuhûdü’l-hâl: Mehmed Efendi Bektaşzâde, Ömer Odabaşı b. Mustafa, İbrahim Odabaşı b. Ali, Zeki Ali Efendi b. Kasım, Mehmed Efendi b. Hasan, Ali Çelebi b. İbrahim, es-Seyyid Hüseyin Efendi b. Abdulkadir, İmâm Mustafa Efendi b. Mehmed, Şeyh Abdurrahman Efendi, eş-Şeyh Mehmed Efendi Vefâyî, Molla Halil b. Ebubekir, Ali Çelebi b. İbrahim