Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 166 Hüküm no: 130 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf sahibi Mehmed Efendi’nin vakfının mütevellisi ile olan alacak-verecek davasında zimmet ibrası Ahbartü bimâ fîhi nemakahû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- Husûs-ı âti’z-zikrin mahallinde ketb ü tahrîri iltimâs olunmağın kıbel-i şer‘-i enverden kâtib-i sânî Mevlânâ La‘lîzâde es-Seyyid Mehmed Ma‘sum Efendi irsâl olunup ol dahi mahmiye-i İstanbul’da Sofular mahallesinde Çardak Kâtibi mefharü’l-kitâb es-Seyyid Hasan Efendi b. es-Seyyid Abdurrahman’ın sâkin olduğu menzile varıp zeyl-i kitâbda mektûbü’l-esâmî Müslimîn huzûrlarında akd-i meclis-i şer‘-i Nebevî ettikde mahmiye-i mezbûrede Defterdâr Ahmed Çelebi mahallesinde sâkin Mehmed Efendi b. İbrahim nâm kimesne meclis-i ma‘kūd-ı mezkûrda kendinin akāra tebdîlini şart eylediği mevlid-i şerîf ve mu‘allimhânesinin nukūd-ı mevkūfesine meşrûtiyet üzere bi’l-fi‘il mütevellî olan umdetü’l-huffâz sâhib-i hâze’l-kitâb el-Hâc İbrahim Efendi b. el-merhûm el-Hâc Hasan Efendi muvâcehesinde ikrâr-ı tâm ve takrîr-i kelâm edip zikri câî akdin sudûruna değin yedimde mülk ve hakkım olup zikr olunan Defterdâr Ahmed Çelebi mahallesinde vâki‘ bir tarafdan Saraç Ahmed Çelebi mülkü ve bir tarafdan Müezzin İbrahim Efendi menzili ve bir tarafdan defterdâr-ı sâbık İbrahim Efendi bahçesi ve bir tarafdan tarîk-i âm ile mahdûd iki bâb tahtânî harâbe oda ve bir sofa ve havlu ve bahçe ve müştemilât-ı sâire-i ma‘lûmeyi hâvî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık vakf-ı mezbûra akār olmak için tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mütevellî-yi mûmâ-ileyh el-Hâc İbrahim Efendi’ye yüz seksen guruşa bey‘ ve temlîk ve teslîm eylediğimde mûmâ-ileyh dahi bi’t-tevliye [mâl-ı] vakf-ı mezbûr ile iştirâ ve kabz ve tesellüm ve kabûl edip semeni olan meblağ-ı mezbûr yüz seksen guruşun seksen guruşunu mâl-ı vakf-ı mezbûreden olmak üzere mütevellî-yi mûmâ-ileyhin yedinden ahz u kabz edip menzil-i mahdûd-ı mezkûru vakf-ı mezbûr musakkafâtından oldukdan sonra mütevellî-yi mûmâ-ileyh el-Hâc İbrahim Efendi menzil-i mahdûd-ı mezkûru yüz guruş icâre-i mu‘accele misli ve yevmî bir akçe icâre-i müeccele mümâsili ile bana bi’t-tevliye îcâr ve teslîm ben dahi ber-vech-i muharrer ba‘de’l-istîcâr ve’l-kabûl menzil-i mezkûr semeninden mütevellî-yi mûmâ-ileyhin zimmetinde bâkī kalan yüz guruşu mu‘accele-i merkūme yüz guruşa takas ve mahsûb ettiğimde mütevellî-yi mûmâ-ileyh dahi mukāssa ve kabûl etmeğin menzil-i mahdûd-ı mezkûra ve mu‘accele-i merkūmenin istîfâsına müte‘allıka âmme-i da‘vâdan cânib-i vakf-ı mezbûr ile mütevellî-yi mûmâ-ileyhin zimmetini ibrâ ve ıskāt eyledim dedikde [19a] gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr İbrahim b. Osman ve Muhzır Mustafa b. el-Hâc Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Muharremi’l-harâm sene 1153. Şuhûdü’l-hâl: Fahrü’l-meşâyihi’l-kirâm Himmetzâde es-Seyyid Nurullah Efendi, umdetü’l-meşâyihi’l-kirâm Abdülhalim Efendi, fahrü’l-kitâb es-Seyyid Hasan Efendi kâtib-i çardak, Mektûbî Mehmed Efendi b. (°), İbrahim Ağazâde Mehmed Ağa, Ömer Çelebi b. Ahmed Efendi, İbrahim Çelebi b. Cafer