Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 168 Hüküm no: 131 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin evini İbrahim Efendi’ye sattığı Ahbartü bimâ fîhi nemakahû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye -gufira lehû- Mübâya‘a Kezâlik akd-i meclis-i şer‘-i kavîm ettikde mahrûse-i Galata’ya tâbi‘ Beşiktaş kasabasında Paşa mahallesi sâkinelerinden fahrü’l-muhadderât Râziye Hanım bt. Ali Paşa b. Abdullah tarafından ikrâr-ı âti’z-zikre vekîl olduğu zâtını ârifân Mehmed Efendi b. İbrahim ve Ömer Çelebi b. Ahmed Efendi şehâdetleriyle ber-nehc-i şer‘î sâbit olan merkūm es-Seyyid Hasan Efendi meclis-i ma‘kūd-ı mezkûrda umdetü’l-huffâzi’l-kirâm sâhib-i hâzihi’l-vesîka el-Hâc İbrahim Efendi b. el-merhûm el-Hâc Hasan Efendi mahzarında bi’l-vekâle ikrâr-ı tâm ve takrîr-i kelâm edip müvekkilem mûmâ-ileyhâ Râziye Hanım arsasının merhûm Kılıç Ali Paşa Vakfı’na senede doksan akçe mukāta‘ası ve üzerinde mevcûd ebniyesi zikri câî akdin sudûruna değin yedimde mülk ve hakkım olup mârrü’z-zikr Paşa mahallesinde vâki‘ bir tarafdan vakf-ı mezbûrdan Bostânî Mehmed tasarrufundaki vakıf menzil ve bir tarafdan Âişe Hatun mülkü ve bir tarafdan ba‘zan Kılıç Ali Paşa Câmi‘-i şerîfi ve ba‘zan Çırağan Yalısı matbahı cidârı ve ba‘zan fırın külhânı ve bir tarafdan tarîk-i âm ile mahdûd tûlen ve arzen bi-hesâb-ı terbî‘î yüz yirmi beş zirâ‘ arsa üzerine mebnî fevkānî bir bâb kebîr oda ve bir bâb sagīr oda ve bir köşk ve kenîf ve tahtânî bir bâb kebîr oda ve matbah ve bi’r-i mâ ve kenîf ve eşcâr-ı müsmire ve gayr-ı müsmireli bahçeyi müştemil mülk menzilin ebniye-i memlûkesini târîh-i vesîkadan bir sene mukaddem tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh el-Hâc İbrahim Efendi’ye iki yüz guruşa bey‘ ve temlîk ve arsasını dahi bâ-ma‘rifet-i mütevellî vakf-ı mezbûra ferâğ ve tefvîz ve teslîm eylediğimde mûmâ-ileyh dahi ber-vech-i mübeyyin iştirâ ve temellük ve kabz ve tefevvüz ve tesellüm ve kabûl eylediğinden sonra semeni olan meblağ-ı mezbûr iki yüz guruşu müşteri-yi mûmâ-ileyhin yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun ebniyesi mûmâ-ileyh el-Hâc İbrahim Efendi’nin mülk-i müşterâsı ve arsa dahi hakk-ı müfevvezi olup kat‘an benim alâka ve medhalim kalmamışdır keyfe mâ yeşâ’ ve yehtâr mutasarrıf olsun dedi dedikde gıbbe’t-tasdîkı’ş-şer‘î vâki‘i mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr İbrahim b. Osman ve Muhzır Mustafa b. el-Hâc Mehmed ile meclis-i şer‘a gelip âlâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Muharrem sene 1153. Eş-şâhidûnü’s-sâbikūn