Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 169 Hüküm no: 132 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un eşi Salih’ten muhâlaa yoluyla boşandığı El-emru kemâ hurrire fîhi nemekahû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- Muhâla‘a Mahmiye-i İstanbul hısnı ebvâbından Cibali Yenikapısı dâhilinde Çukur mahallede sâkine olup zâtı Ebubekir b. Ahmed ve Ali b. Ali nâm kimesneler ta‘rîfleriyle mu‘arrefe olan Şerife Hanife bt. es-Seyyid Mustafa nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu bâ‘isü’l-kitâb Salih b. Hasan nâm kimesne mahzarında ikrâr-ı tâm ve takrîr-i kelâm edip mezbûr Salih zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Salih ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâ ve kâffe-i mutâlebât ve eymân ve muhâsamâtdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Muharremi’l-harâm sene 1153. Şuhûdü’l-hâl: Koltukçu Ahmed b. Abdullah, Süleyman b. Hamza, Abdurrahman b. Ömer, Ali Çelebi b. Ali, Ebubekir Çelebi b. Ahmed