Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 169 Hüküm no: 133 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Odabaşı’nın evini Kirkor ve eşi Ana’ya sattığı Mübâya‘a Dergâh-ı âlî -dâme mahfûfen bi’l-me‘âlî- yeniçerilerinin dördüncü cemâ‘atine mahsûs oda yoldaşlarından Abdullah Odabaşı b. İbrahim nâm kimesne meclis-i şer‘-i hatîr-ı lâzımü’t-tevkīrde bâ‘isey-i hâze’s-sifr Kirkor v. Artin nâm zimmî ile zevcesi olup şahsı ta‘rîf-i şer‘î ile mu‘arrefe olan Ana bt. Hacr nâm Nasrâniye muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i İstanbul hısnı ebvâbından Fenerkapısı dâhilinde Tahta Minâre mahallesinde vâki‘ etrâf-ı erba‘ası Ahmed Ağa ve Pavli Kalfa ve Kibarsune mülkleri ve tarîk-i âm ile mahdûd fevkānî bir bâb oda ve bir sofa ve bir matbah ve tahta-pûş ve tahtânî bir bâb oda ve bir sofa ve bir matbah ve bir mahzen ve bir mikdâr bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûrân Kirkor ve zevcesi Ana Nasrâniyeye alâ-iştirâki’s-seviyy dört yüz on guruşa bey‘ ü temlîk ve teslîm eylediğimde onlar dahi ber-vech-i iştirâk iştirâ ve tesellüm ve temellük ve kabz ve kabûl eylediklerinden sonra semeni olan meblağ-ı mezbûr dört yüz on guruşu merkūmân Kirkor ve zevcesi Ana Nasrâniye yedlerinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp mezbûrân Kirkor ve zevcesi Ana Nasrâniyenin ale’l-iştirâki’s-seviyy mülk-i müşterâları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Muharremi’l-harâm sene 1153. Şuhûdü’l-hâl: Hüseyin Ağa b. Ali, Müezzin İsmail Halîfe b. Mehmed, el-Hâc Hüseyin Odabaşı b. Hasan, İsmail Odabaşı b. Derviş Ali, Derviş Abdullah b. Süleyman, Hüseyin Odabaşı b. Osman