Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 170 Hüküm no: 134 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem asıllı olan köleler ferman ile azat edildiğinden Acem asıllı olan Hatice’nin de azat edilmesi gerektiği El-emru kemâ hurrire fîhi nemekahû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- İsbât-ı Acem Rıkka inkıyâdı sebk etmekle ber-vech-i âtî kıbel-i şer‘den da‘vâya me’zûne olan orta boylu, açık kaşlı, kara gözlü, Müslimetü’l-millet, bâ‘isetü hâzihi’l-vesîka Hadîce meclis-i şer‘-i hatîr-ı lâzımü’t-tevkīrde kendüye rakīka olmak üzere vâzı‘u’l-yed olan Mosi v. Yasef nâm Yahûdi muvâcehesinde üzerine da‘vâ ve takrîr-i kelâm edip ben vilâyet-i İran’da medîne-i Tebriz mahallâtından Deveciler mahallesi ahâlîsinden Acemü’l-asl Müslimü’n-neseb Zerbâbcı Hüseyin b. Ahmed’in firaşından hâsıla ve zevce-i menkûhası Acemiyyetü’l-asl Müslimetü’n-neseb Âişe bt. Mustafa’dan mütevellide olup bâ-fermân-ı âlî sebîlleri tahliye olunan Müslimetü’n-neseb Acem cinsinden iken mezbûr Mosi bana Gürciyyetü’l-asl rakīka olmak zu‘muyla vaz‘-ı yed etmekle suâl olunup sebîlim tahliye ve mezbûrun kasr-ı yedine tenbîh olunmak matlûbumdur dedikde gıbbe’s-suâl mezbûr Mosi cevâbında mevsûfe-i mezbûreyi târîh-i kitâbdan altı sene mukaddem gāib ani’l-meclis ismi ma‘lûmum olmayan bir kimesneden Gürciyyetü’l-asl rakīka olmak üzere iki yüz yirmi guruş semen-i medfû‘ ve makbûza iştirâ edip müşterâ câriyesi olmak üzere vaz‘-ı yedini ikrâr lâkin mevsûfe-i mezbûrenin bâ-fermân-ı âlî sebîlleri tahliye olunan Müslimetü’n-neseb Acem cinsinden olduğu ma‘lûmum değildir deyü inkâr edicek mevsûfe-i mezbûreden ber-vech-i muharrer müdde‘âsına mutâbıka beyyine taleb olundukda udûl-ı ahrâr-ı ricâl-i Müslimînden ve medîne-i mezbûre ahâlîsinden olup mahmiye-i İstanbul’da Vezir Hanı sükkânından Mustafa b. Mehmed ve Mehmed b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu orta boylu, açık kaşlı, elâ gözlü, Müslimetü’l-millet Hadîce vilâyet-i İran’da medîne-i Tebriz mahallâtından Deveciler mahallesi ahâlîsinden Acemü’l-asl Müslimü’n-neseb Zerbâbcı Hüseyin b. Ahmed’in firâşından hâsıla ve zevce-i menkûhası Acemiyyetü’l-asl Müslimetü’n-neseb Âişe bt. Mustafa’dan mütevellide olup mevsûfe-i mezbûre bâ-fermân-ı âlî sebîlleri tahliye olunan Müslimetü’n-neseb Acem cinsindendir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûre Hadîce’nin ber-mûceb-i emr-i âlî sebîli tahliye ve mezbûr Mosi’nin kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe sene 1152. Şuhûdü’l-hâl: el-Hâc Mustafa b. el-Hâc Mehmed, es-Seyyid Mustafa b. es-Seyyid Hasan, Hüseyin Çelebi b. Hacı Mehmed, Mehmed Çelebi b. Abdullah, el-Hâc Ahmed b. (°)