Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 171 Hüküm no: 135 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem asıllı olan köleler ferman ile azat edildiğinden Acem asıllı olan Şehriban’ın da azat edilmesi gerektiği El-emru kemâ hurrire fîhi zeberehû el-fakīr ileyhi azze şânühû el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- İsbât-ı Acem Rıkka inkıyâdı sebk etmekle ber-vech-i âtî kıbel-i şer‘den da‘vâya me’zûne olan orta boylu, açık kaşlı, kara gözlü, bâ‘isetü’l-kitâb Şehriban nâm-ı diğer Âişe meclis-i şer‘-i hatîr-ı lâzımü’t-tevkīrde kendüye rakīka olmak üzere vâzı‘u’l-yed olan Mehmed b. Osman nâm kimesne muvâcehesinde üzerine da‘vâ ve takrîr-i kelâm edip ben vilâyet-i İran’da Revan kazâsına tâbi‘ Hisar karyesi ahâlîsinden Müslimü’n-neseb Mehmed Hüseyin b. Mehmed Ali nâm kimesnenin firâşından hâsıl ve Müslimetü’n-neseb zevcesi Sahibcemal bt. Mehmed Ali nâm hatundan mütevellide ve bâ-fermân-ı âlî sebîlleri tahliye olunan Müslimetü’n-neseb Acem cinsinden iken mezbûr Mehmed bana rakīka olmak zu‘muyla bi-gayr-ı vechin vaz‘-ı yed eder suâl olunup sebîlim tahliye ve mezbûrun kasr-ı yedine tenbîh olunmak matlûbumdur dedikde gıbbe’s-suâl merkūm Mehmed cevâbında mevsûfe-i mezbûreyi Gürciyyetü’l-asl olmak üzere gāib ani’l-meclis Esirci el-Hâc Salih nâm kimesneden yüz seksen guruş semen-i medfû‘ ve makbûza iştirâ edip câriye-i memlûkesi olmak üzere vaz‘-ı yedini ikrâr mâ‘adâyı inkâr edicek müdde‘iye-i mevsûfe-i mezbûreden ber-vech-i mübeyyen müdde‘âsına beyyine taleb olundukda udûl-ı ahrâr-ı ricâl-i Müslimînden ve karye-i mezbûre ahâlîsinden olup mahmiye-i İstanbul’da Vezir Hanı’nda ticâret vechi üzere sâkin Ahmed b. Mehmed ve Mustafa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mevsûfe-i mezbûre Şehriban nâm-ı diğer Âişe Revan kazâsına tâbi‘ Hisar karyesi ahâlîsinden Müslimü’n-neseb Mehmed Hüseyin b. Mehmed Ali’nin firâşından hâsıl ve Müslimetü’n-neseb zevcesi Sahibcemal bt. Mehmed Ali nâm hatundan mütevellide olup bâ-fermân-ı âlî sebîlleri tahliye olunan Müslimetü’n-neseb Acem cinsindendir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i mezbûrenin sebîli tahliye ve merkūm Mehmed’in kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe sene 1152. Şuhûdü’l-hâl: el-Hâc Ahmed b. Hacı Mustafa, es-Seyyid Mustafa b. Hasan, Acem Ali b. Abdullah, Mehmed b. Abdullah, Salih Çelebi b. Süleyman