Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 172 Hüküm no: 136 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babalarından İbrahim ve Molla Mehmed’e kalan vakıf evin bölünerek ikisi arasında paylaştırıldığı Husûs-ı âti’l-beyânın mahallinde keşf ve taksîmi için sâdır olan fermân-ı âlîlerine imtisâlen savb-ı şer‘den irsâl olunan keşif nâibi Hıfzı el-Hâc Mehmed Efendi hâssa mimâr hulefâsından Süleyman Halîfe b. Abdi ve Hasan b. Ali nâm kimesne mahmiye-i İstanbul’da Tahtelkale kurbünde el-Hâc Timurtaş mahallesinde vâki‘ bundan akdem vefât eden Şeyh Mahmud b. Ali nâm müteveffânın Hoca Hamza Vakfı’ndan bi’l-icâreteyn hayâtında tasarrufunda olan menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî ettikde müteveffâ-yı mezbûrun sulbî kebîr oğlu işbu bâ‘isü’l-kitâb Molla Mehmed meclis-i ma‘kūd-ı mezkûrda karındaşı el-Hâc İbrahim mahzarında vakf-ı mezbûr kāimmakām-ı mütevellîsi Hammâmî Ali Efendi hâzır olduğu halde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan paçahâne ve bir tarafdan kirman? ve bir tarafdan vakf-ı mezbûrdan el-Hâc İbrahim tasarrufunda olan arsa ve bir tarafdan tarîk-i âm ile mahdûd fevkānî üç bâb oda ve dehliz ve tahtında bir bâb dükkân ve bir su kuyusunu müştemil işbu akd-i meclis-i şer‘ olunan menzil ve dükkânlar babamız müteveffâ-yı mezbûrun hayâtında bi’l-icâreteyn tasarrufunda olup ba‘de vefâtihî intikāl-i âdî ile bana ve karındaşım mezbûr el-Hâc İbrahim’e intikāl etmekle menzil-i mezkûr her birimize nef‘ verir vech üzere kābil-i kısmet olup ve taksîmi vakf-ı şerîfe muzır olmamağla her birlerimizin hisseleri ifrâz ve alâmât-ı fâsıla vaz‘ıyla mümtâz kılınmak matlûbumuzdur dedikde gıbbe’t-tasdîk mimârân-ı mezbûrân mesâha eylediklerinde mecmû‘-ı arsa tûlen ve arzen bi-hesâb-ı terbî‘î yüz yirmi üç buçuk zirâ‘ olup zikr olunan arsa tarafı ba‘zan değirmen tarafı ve tarîk-i âm tarafından tûlen altı zirâ‘ ve on sekiz parmak terbî‘an altmış dört zirâ‘ arsa üzerinde fevkānî iki bâb sagīr oda ve sagīr dehliz ve tahtında kenîf ve mağsel ve iki bâb dükkân mezbûr el-Hâc İbrahim’in hisessi mukābelesinde bi’t-terâzi ifrâz ve ta‘yîn ve sâlifü’z-zikr paçahâne tarafı ve ba‘zan değirmen ve tarîk-i âm tarafından kezâlik altı zirâ‘ on sekiz parmak terbî‘an elli dokuz buçuk zirâ‘ arsa üzerinde fevkānî bir bâb kebîr oda ve kebîr dehliz ve tahtında iki bâb dükkân ve bir su kuyusunu mezbûr Molla Mehmed’in hissesi mukābelesinde bi’t-terâzi ifrâz ve ta‘yîn ve alâmât-ı fâsıla vaz‘ıyla her birlerinin hisseleri mümtâz kılınıp hisse-i müfrezelerini mezbûrân ahz [20a] ü kabz ve kabûl edip husûs-ı mezkûra müte‘allıka da‘vâdan her biri âharın zimmetlerin ibrâ ve mütevellî-yi vakf-ı mezbûr dahi hisse-i müfrezelerinin tasarruflarına izin verdiğini mevlânâ-yı mezbûr mahallinde ketb ü tahrîr ve ma‘an meb‘ûs Çukadâr Mustafa ve Muhzır Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharremi’l-harâm sene 1153. Şuhûdü’l-hâl: Fahrü’l-eimme Hasan Efendi, Ahmed Efendi b. Mehmed, İbrahim b. İsmail, Mehmed b. Mahmud, Abdullah b. Mehmed, el-Hâc Hasan b. (°), Veli b. Hasan, Boşnak Ali b. Ahmed