Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 174 Hüküm no: 138 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamarşırcı esnafının kethüdaları Mehmed ve yiğitbaşıları Molla Ali’den memnun oldukları Çâmeşûycuların ta‘ahhüdleridir Mahmiye-i İstanbul’da vâki‘ çâmeşûycu esnafından Ömer b. Hüseyin ve Hüseyin b. Ali ve diğer Hüseyin b. Mehmed ve Mehmed b. Ali ve Salih b. İslâm ve Mehmed b. Pîrî ve Hasan b. Mehmed ve Mehmed b. Ahmed ve Molla Osman b. Süleyman ve Ali b. Mehmed ve el-Hâc Abdulkadir b. Ahmed ve es-Seyyid Mehmed b. Hüseyin ve Mustafa b. Hüseyin ve Ebubekir b. Ali ve es-Seyyid Mustafa b. el-Hâc Ali ve Halil b. Hasan ve Ali b. Mehmed ve İsmail b. Hasan ve el-Hâc Mehmed b. Hüseyin ve Mehmed b. Mustafa ve Ali b. Abdullah ve Halil b. Ali ve es-Seyyid Mustafa b. Hüseyin ve sâirleri meclis-i şer‘-i hatîr-ı lâzımü’t-tevkīrde bâ-berât-ı âlîşân hâlâ kethüdâları ve yiğitbaşıları olan bâ‘iseyü’l-vesîka es-Seyyid Mehmed b. el-Hâc Ali ve Molla Ali b. el-Hâc Mehmed muvâcehelerinde her biri takrîr-i kelâm ve bast-ı merâm edip içlerimizden üçer nefer kimesne bundan akdem kethüdâ-yı merkūm es-Seyyid Mehmed ve yiğitbaşı-yı mezbûr Molla Ali iktizâ eden umûrumuza bizi karışdırmayıp kendileri rü’yet ederler deyü teşekkî etmişler idi hâlâ bizler kethüdâmız mezbûr es-Seyyid Mehmed ile yiğitbaşımız Molla Ali’nin evzâ‘ ve etvârından hoşnûd ve râzılarız ve merkūmân esnaf-ı merkūmun iktizâ eden umûrunu cümle ihtiyârları ma‘rifetleriyle rü’yet ederler ve merkūm es-Seyyid Mehmed’in kethüdâlığını ve mezbûr Molla Ali’nin yiğitbaşılığını isteriz deyü mezbûrânın hüsn-i hâl üzere olduklarını alâ-tarîkı’ş-şehâde ihbâr ettiklerinde mezbûrân es-Seyyid Mehmed ve Molla Ali dahi fîmâ-ba‘d esnaf-ı mezbûrun iktizâ eden umûrunu ihtiyârları ma‘rifetleriyle rü’yet eyleyip nizâmlarına mugāyir vaz‘ u hareket etmemek üzere ta‘ahhüd etmeleriyle hıfzan li’l-makāl mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharrem sene 1153. Şuhûdü’l-hâl: Mehmed Ağa b. Mehmed, Mehmed Ağa b. Abdullah, Salih b. Süleyman, es-Seyyid Mustafa Ruhalı, el-Hâ[c] Mustafa Arabzâde, Ahmed b. Şa‘bân, Solak Mustafa muhzır