Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 175 Hüküm no: 140 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim Efendi’nin evini Avak v. Kokas’a sattığı Mübâya‘a-i menzil Mahmiye-i İstanbul’da Zincirlikuyu kurbünde Ali Paşa’yı atîk mahallesi ahâlîsinden Abdülkerim Efendi b. Mahmud meclis-i şer‘-i hatîr-ı lâzımü’t-tevkīrde işbu bâ‘isü’s-sifr Avak v. Kokas nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Topkapısı kurbünde Bayezid Ağa mahallesinde vâki‘ bir tarafdan Teberdâr Mustafa Ağa veresesi yedlerinde olan müteehhilîn odaları ve bir tarafdan Ahmed Paşa Vakfı musakkafâtından olup Terzi Bedros zimmî tasarrufunda olan menzil ve bir tarafdan tarîk-i âm ile mahdûd fevkānî beş bâb oda ve dehliz ve tahtânî dört bâb oda ve bir matbah ve bir bi’r-i mâ ve bir kenîf ve bir mikdâr havluyu müştemil mülk menzilimiz bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü [hâvî] şurût-ı müfsideden ârî bey‘-i bâtt-ı sahîh-i şer‘î ile mesfûr Avak zimmîye altı yüz on bir guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altı yüz on bir guruşu mesfûr Avak zimmî yedinden tamâmen ahz u kabz eyledim fîmâ-ba‘d menzil-i mahdûd-ı mezkûrda benim alâkam ve medhalim kalmayıp mesfûr Avak zimmînin mülk-i müşterâsı ve hakk-ı sırfı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Muharremi’l-harâm sene 1153. Şuhûdü’l-hâl: Mehmed Efendi b. İsa, es-Seyyid Abdülaziz Ağa muhzır-ı Sadr-ı Rum, Abdurrahman Efendi kādı-i Ahyolu-yı sâbık, es-Seyyid Mustafa Ağa muhzır-ı Sadr-ı Rum, Molla Ahmed b. Halil, Molla Hüseyin b. Hacı Mehmed, el-Hâc Mustafa b. Hacı Mehmed Arabzâde