Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 176 Hüküm no: 141 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Ali’den boşanan Zeyneb bt. Abdullah’ın mehrini aldığı Mehrini ahz Mahmiye-i İstanbul’da Hoca Hayreddin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zeyneb bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i gayr-ı dâhili işbu bâ‘isü’l-vesîka Yusuf b. Ali nâm kimesne mahzarında ikrâr-ı tâm ve takrîr-i kelâm edip mezbûr Yusuf ile beynimizde şikāk vâki‘ olmağla kable’d-duhûl ve’l-halvet beni ric‘iyyen tatlîk etmekle zimmetinde mütekarrer ve ma‘kūdün-aleyh iki bin akçe mehr-i müeccelimden şer‘an lâzım gelen bin akçe mehr-i müeccelimden şer‘an lâzım gelen bin akçe nısf mehr-i müeccelimi mezbûr Yusuf bana edâ ve teslîm ettikde ben dahi yedinden tamâmen ahz u kabz eylediğimden sonra hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Muharrem sene 1153. Şuhûdü’l-hâl: es-Seyyid Mustafa Efendi el-imâm, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mustafa, Mustafa Ağa b. Hacı Mehmed, Mustafa b. Mehmed, es-Seyyid Ali b. Mustafa, el-Hâc Mustafa Arabzâde