Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 176 Hüküm no: 142 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız İbrahim Efendi b. Hasan Efendi’nin vakfiyesi Mâ-hüve’l-mastûr fi’l-kırtâs Nâfi‘un li-umûri’d-dîn ve’n-nâs Ve ene’l-fakīr ileyhi sübhânehû ve te‘âlâ el-Hâc İbrahim el-müvellâ hilâfeten bi-medîneti Kostantıniyye el-mahmiye -gufira lehû- Vakfiye-i Hâfız el-Hâc İbrahim Efendi Hamd-i bî-had ve senâ-i lâ-yü‘ad ol vâkıf-ı ins ü cân ve hâlik-ı dü-cihân mâlikü’l-mülk ve’l-mülûk Rabbü’l-izzeti ve’l-ceberrût cellet hikmetuhû ve allet kelimetuhû hazretlerinin dergâh-ı ismet-penâhîlerine ref‘ olunur ki, nüsha-i insânî ketm-i ademden ahsen-i takvîm üzere ibdâ‘ ve imlâ ve ebda‘-ı üslûb-ı kadîm üzere ihtirâ‘ ve inşâ edip sâlik-i ma‘âşını ve menâhic-i ma‘âdini tefhîm eyledi, sad-hezârân dürer-i salât ü selâm ve gurer-i senâ-i huceste-nizâm ol âfitâb-ı evc-i levlâk ve mâh-tâb-ı semâ ve erselnâke müstenid-i mesned-ıstıfâ Muhammedü’l-Mustafa -sallallâhu te‘âlâ aleyhi ve sellem- mâ teharreke’ş-şimâl ve tenessem hazretlerinin ravza-i razıyye[lerine nisâr] ve hatîre-i behiyyelerine îsâr olunur ki, ümmetini dîn-i kavîme hidâyet ve tarîk-i müstakīme delâlet eyledi ve dahi âl-i izâm ve ashâb-ı kirâmlarına ithâf ve ihdâ olunur ki, nücûm-ı âsumân-ı dîn ve kevâkib-i bürûc-ı yakīndir rıdvânullâhi te‘âlâ aleyhim ecma‘în ammâ ba‘d işbu kitâb-ı sıhhat-nisâbın tahrîrine bâ‘is ü bâdî ve bu hitâb-ı müşkîn-nikābın tastîrine sebeb ve dâ‘î oldur ki, Dârü’l-hilâfeti’l-aliyye Kostantıniyyetü’l-mahmiyede Atmeydanı kurbünde Nahılbend el-Hâc Hasan mahallesinde sâkin sâhibü’l-hayrât ve’l-hasenât ve tâlibü’s-sadakāt ve’l-meberrât umdetü’l-huffâzi’l-kirâm el-Hâc İbrahim Efendi b. el-merhûm el-Hâc Hasan Efendi b. Abdullah meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vakf-ı âti’z-zikre li-ecli’t-tescîl mütevellî nasb u ta‘yîn eylediği çardak kâtibi kıdvetü’s-sâdâti’l-kirâm es-Seyyid Hasan Efendi b. es-Seyyid Abdurrahman muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î edip atyab-ı mâl ve enfes-i menâlimden beş yüz guruş ifrâz ve kemâl-i imtiyâzıyla mümtâz kılıp meblağ-ı mezbûru hasbeten lillâhi’l-meliki’s-samed ve taleben li-merzâti Rabbihi’l-ahad vakf-ı sahîh-i müebbed ve habs-i sarîh-i muhalled ile vakf ü habs edip şöyle şart eyledim ki, meblağ-ı mezbûr beş yüz guruş rehn-i kavî ve kefîl-i melî yâhûd ikisinden biriyle senede onu on bir hesâbı üzere alâ-vechi’l-helâl istirbâh ve istiğlâl olunup bi-fazlillâhi te‘âlâ hâsıl olan elli guruş galle ve nemâsından yevmî beş akçeyi mahrûse-i Galata’ya tâbi‘ Beşiktaş kasabasında vâki‘ Sinan Paşa Câmi‘-i şerîfi mukābilinde Sinan Paşa Vakfı’ndan olan tekyede tarîk-i Nakşibendiye’den seccâde-nişîn olan şeyhim umdetü’l-ârifîn zahrü’l-vâsilîn eş-Şeyh Mustafa Efendi b. el-merhûm (°) ahz ve heft hatm-i hâcegân günü akīb-i mukābelede dervişlerine it‘âm ba‘dehû abd-ı fakīre du‘â-i hayr ile yâd buyuralar ve yevmî iki akçe vazîfe ile vakf-ı mezbûra hayâtda oldukça kendim mütevellî ola ba‘de’l-vefât mûmâ-ileyh eş-Şeyh Mustafa Efendi meşrûtiyet üzere mütevellî ola ba‘de vefâtihî evlâdı ve evlâd-ı evlâdı ve evlâd-ı evlâd-ı evlâdı mütevellî olalar, ne‘ûzü billâhi te‘âlâ ba‘de’l-inkırâz tekye-i merkūmda tarîk-i Nakşibendiye’den her kim şeyh olur ise tevliyet-i mezkûre ona meşrûta ola ve galle-i mezbûreden her ne fazla kalır ise ta‘âmiyeye şeyh-i mûmâ-ileyhin yediyle harc ü sarf oluna ve nukūd-ı vakf-ı mezbûr re’y-i hâkimü’ş-şer‘le vakfa enfa‘ olur vech üzere yed-i mütevellî ile akāra tebdîl oluna ve cihât-ı mezkûreye ashâbı hayâtda oldukça benim arzımla mutasarrıf olup ba‘de’l-vefât nâzır-ı vakf-ı mezbûr arzıyla mutasarrıf olalar ve vakf-ı mezbûr mahmiye-i İstanbul kādısı nezâretinde olup senevî bir kere vech-i şer‘î üzere muhâsebesi görüle ve vakf-ı mezbûrun tebdîl ü tağyîr ve taklîl ü teksîri merreten ba‘de uhrâ yedimde ola ve mürûr-ı eyyâm ve kürûr-ı şuhûr ve a‘vâm ile şurût-ı muharrere-i mezkûreye ri‘âyet müte‘azzire olur ise nukūd-ı vakf-ı mezbûr mutlakā vakf-ı fukarâ-i Müslimîn ola deyü ta‘yîn-i şurût ve tebyîn-i kuyûd edip meblağ-ı mezbûr beş yüz guruşu merkūm es-Seyyid Hasan Efendi’ye def‘ ü teslîm eylediğimde ol dahi tevliyeti hasebiyle yedimden kabz ve tesellüm ve sâir mütevellîlerin evkāfdaki tasarrufları gibi tasarruf eyledi dedikde gıbbe’t-tasdîkı’ş-şer‘î mûmâ-ileyh el-Hâc İbrahim Efendi vakf-ı nukūdu eimme-i dîn katında sahîh ve lâzım değildir deyü mütevellî-yi merkūm es-Seyyid Hasan Efendi ile ba‘de’d-da‘vâ ve talebi’l-mürâca‘a ve’l-istinkâf bi-alây-ı kitâb-ı müstetâbı kalem-i müşkîn rakamlarıyla tezyîn eden hâkim-i hâsım hazretleri dahi alâ-kavli men-yerâhu mine’l-müctehidîn vakf-ı mezbûrun sıhhat ve lüzûmuna hükm-i sahîh-i şer‘î ve kazâ-i sarîh-i mer‘î etmeğin min-ba‘d vakf-ı mezbûr sahîh ve lâzım ve mütehattim oldu ve ecrü’l-vâkıfi alâ-hayyi’l-cevâdi’l-kerîm cerâ zalike. Ve hurrire fi’l-yevmi’s-sâmin min-Muharremi’l-harâm li-sene selâse ve hamsîn ve mi’e ve elf. Şuhûdü’l-hâl: A‘lemü’l-ulemâi’l-izâm Abdullah Efendizâde Mehmed Salih Efendi kādı-i Şam-ı sâbık, umdetü’l-ulemâi’l-izâm İsmail Efendi kādı-i Bursa sâbıkā, fahrü’l-mevâli’l-izâm İsazâde Abdurrahman Efendi kādı-i Edirne muvakkaten, mefharü’l-mevâli’l-izâm Şeyhzâde Ahmed Efendi kādı-i Selanik muvakkaten, fahrü’l-müderrisîni’l-kirâm Murad Efendizâde es-Seyyid Ahmed Efendi, fahrü’l-müderrisîni’l-kirâm La‘lîzâde es-Seyyid Mehmed Ma‘sum Efendi, fahrü’l-meşâyihi’l-kirâm Abdülhalim Efendi Şeyh-i câmi‘-i Mirâhur, zahrü’l-meşâyihi’l-kirâm Himmetzâde es-Seyyid Nurullah Efendi, fahrü’l-meşâyihi’l-kirâm Mehmed Sadîk Efendi b. eş-Şeyh Mustafa Efendi [20b] Ömer Efendizâde Abdurrahman Efendi imâm-ı evvel-i Ayasofya, Arabzâde Mehmed Efendi hoca-i mekteb-i Sultan Mahmud Hân, Hamzazâde eş-Şeyh Mehmed Said Efendi, Efe Mustafa hatîb-i câmi‘-i Şehzâde, el-Hâc İsmail Efendi imâm-ı Mahmud Paşa, Evliyâzâde Mustafa Efendi halîfe-i Harameyn