Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 178 Hüküm no: 143 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ömer ile hanımı Rukiye’nin arsalarını Mehmed Ağa’ya sattıkları Mübâya‘a-i arsa Mahmiye-i İstanbul’da Muhtesib İskender mahallesi ahâlîsinden olup kendi nefsinden asîl ve zevcesi Rukiye bt. Abdullah b. Abdurrahman nâm hatun tarafından husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mustafa [b.] İsmail ve İbrahim Beşe b. Ali nâm kimesneler şehâdetleriyle sâbit olan el-Hâc Ali b. Ömer nâm kimesne meclis-i şer‘-i hatîr-ı lâzımü’t-tevkīrde bâ‘is-i hâze’l-kitâb el-Hâc Mehmed Ağa b. Üveys nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip mahmiye-i mezbûrede Akseki mahallesinde vâki‘ etrâf-ı erba‘ası Doğramacı Hüseyin ve Hankü nâm hatun ve Çukadâr Ömer ve Sahhâfzâde Mustafa Efendi ve kârhâne ustası menzilleri ve tarîk-i âm ile mahdûd ma‘lûmü’l-müştemilât muhterik mülk menzil arsasından mârrü’z-zikr kârhâne ustası tarafından alâmât-ı fâsıla ile ta‘yîn ve ifrâz olunan tûlen ve arzen bi-hesâb-ı terbî‘î tahmînen seksen yedi zirâ‘ arsa-i hâliyemizi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm el-Hâc Mehmed Ağa’ya seksen beş guruşa bi’l-asâle ve bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr seksen beş guruşu mezbûr el-Hâc Mehmed Ağa yedinden tamâmen ahz u kabz eyledim ba‘de’l-yevm zikr olunan seksen yedi zirâ‘ arsa-i hâliyede benim ve zevcem müvekkile-i mezbûre Rukiye Hatun’un kat‘an alâka ve medhalimiz kalmayıp mezbûr el-Hâc Mehmed Ağa’nın mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Muharrem sene 1153. Şuhûdü’l-hâl: Mustafa Çelebi b. İsmail, İbrahim Beşe b. Ali, Ömer Beşe b. Yusuf