Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 179 Hüküm no: 144 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah’ın çocukları Hayrullah ve Hayri’ye nafaka takdiri Nafaka Mahmiye-i İstanbul’da Ali Paşa-i atîk mahallesinde sâkine olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Hacce Rukiye bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Anadolu kuzâtından Mustafa Efendi b. el-merhûm Muhzır el-Hâc Hüseyin nâm kimesne mahzarında takrîr-i kelâm ve bast-ı merâm edip mezbûr Mustafa zevcim olup bundan akdem beni bâyinen tatlîk etmekle mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde olan Hayrullah nâm sagīre ile Hayri nâm sagīrenin mâlları olmamağla nafaka ve kisveye ihtiyâcları olmağın kıbel-i şer‘-i enverden babaları mezbûr Mustafa Efendi üzerine kadr-ı ma‘rûf akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın bi’t-terâzi babaları mezbûr Mustafa Efendi üzerine târîh-i kitâbdan her birine yevmî on ikişer akçeden cem‘an yirmi dört akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīrân-ı mezbûrânın nafaka ve kisve ve sâir levâzım-ı zarûriyelerine harc ü sarfa ve lede’l-iktizâ istidâneye ve inde’z-zafer babaları mezbûr Mustafa Efendi üzerine rücû‘a mezbûre Hacce Rukiye Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Muharremi’l-harâm sene 1153. Şuhûdü’l-hâl: es-Seyyid Mustafa b. es-Seyyid Hasan, Ahmed Çelebi b. Mustafa, Mehmed Çelebi b. Abdullah, Salih Çelebi b. Süleyman