Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 180 Hüküm no: 145 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babası hayatta iken bazı eşyalarına el koyan Hüseyin ile bülûğa erdikten sonra dava açan Mehmed arasındaki alacak meselesine sulh bedeli karşılığı son verildiği Sulh Mahmiye-i İstanbul’da Karagümrük kurbünde sâkin iken bundan akdem vefât eden Arabacı Yusuf b. Abdullah b. Abdurrahman’ın sulbî oğlu ve hasren vârisi olup sin [ve] cüssesinin bülûğa tahammülü olmağla bülûğunu mu‘terif olan Mehmed nâm kimesne meclis-i şer‘-i hatîr-ı lâzımü’t-tevkīrde işbu bâ‘isü’l-vesîka Hüseyin b. Mehmed nâm kimesne mahzarında ikrâr ve takrîr-i kelâm edip târîh-i vesîkadan beş sene mukaddem babam müteveffâ-yı mezbûr Yusuf’un hîn-i vefâtında yanında mevcûd terekesinden mecmû‘u altmış guruş kıymetli üç re’s bargir ile bir sirem arabasını mezbûr Hüseyin bi-gayr-ı hakkın ahz u kabz etmekle zikr olunan bargirler ile arabanın aynları mevcûd ise aynlarını müstehlek ise ba‘de’s-sübût kıymet-i şer‘iyyelerini mezbûr Hüseyin’den taleb ederim deyü da‘vâ sadedinde iken beynimizde muslihûn tavassut edip da‘vâ-yı mezkûremden beni mezbûr Hüseyin ile beş guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezkûru kabûl ve bedel-i sulh olan meblağ-ı mezbûr beş guruşu mezbûr Hüseyin’in yedinden ahz u kabz edip husûs-ı mezkûra müte‘allıka âmme-i da‘vâdan mezbûr Hüseyin’in zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Muharrem sene 1153. Şuhûdü’l-hâl: el-Hâc Ahmed b. Mehmed, Du‘âcı Molla Hüseyin b. Mehmed, Mehmed Çelebi b. Abdullah