Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 180 Hüküm no: 146 Orijinal metin no: [21a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un istiğlâl yoluyla borç aldığı İstiğlâl Mahmiye-i İstanbul’da Sofular mahallesi sâkinelerinden olup zâtı Molla Mustafa b. el-Hâc Ahmed ve Hasan Ağa b. Hüseyin ta‘rîfleriyle mu‘arrefe olan Safiye bt. Abdullah nâm hatun meclis-i şer‘-i hatîr-ı lâzımü’t-tevkīrde Dergâh-ı âlî yeniçerilerinin kırk altı cemâ‘atine mahsûs oda neferâtının mühimmâtlarına mevkūfe nukūdun bi’l-fi‘il mütevellîsi olan işbu bâ‘isü’l-kitâb Hasan Odabaşı b. Receb mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Dergâh-ı âlî yeniçerileri odaları ve bir tarafdan Orta Câmi‘-i şerîfi imâmlarına meşrûta vakıf menzil ve bir tarafdan Bahane Hanım menzili ve bir tarafdan ba‘zan Fâtıma Hatun menzili ve ba‘zan tarîk-i hâs ile mahdûd ma‘lûmü’l-müştemilât mülk menzilimi mütevellî-yi mezbûr Hasan Odabaşı’ya bi-tarîkı’l-istiğlâl beş yüz guruşa bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eylediğinden sonra meblağ-ı mezbûr beş yüz guruşu nukūd-ı mevkūfe-i mezbûreden olmak üzere mezbûr Hasan Odabaşı yedinden tamâmen ahz u kabz eylediğimden sonra mütevellî-yi mezbûr Hasan Odabaşı menzil-i mahdûd-ı mezkûru gıbbe’t-tahliyeti’ş-şer‘î ve’t-tekābuzü’l-mer‘î târîh-i kitâbdan bir sene tamâmına değin yetmiş beş guruşa bi’t-tevliye bana îcâr ve teslîm ben dahi istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm sene 1153. Şuhûdü’l-hâl: el-Hâc Halil Odabaşı b. İbrahim, el-Hâc İsmail Ağa b. Süleyman, Abdullah Odabaşı b. Mehmed, el-Hâc Ahmed Ağa b. Süleyman, Halil Çelebi b. Yahya, Osman Ağa b. Hacı Abdullah, el-Hâc Hasan Çelebi b. İbrahim, Abdullah Odabaşı b. Mehmed, el-Hâc Salih Odabaşı b. Mustafa