Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 182 Hüküm no: 149 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nalband Mehmed’in varislerinden Hasan Beşe’nin terekeden olan nalband dükkânı ve eşyalardaki hissesini Hüseyin Çelebi’ye sattığı Mübâya‘a Vilâyet-i Anadolu’da Afyon Karahisarı kasabasında İmâret mahallesinde sâkin iken bundan akdem vefât eden Nalband Mehmed b. Hızır b. Abdullah’ın verâseti zevce-i menkûha-i metrûkesi Neslihan bt. Receb nâm hatun ile sulbî kebîr oğlu Hasan Beşe ve sulbiye kebîre kızları Âişe [ve] İsmihan’a münhasıra ve tashîh-i meselesi otuz iki sehmden olup sihâm-ı mezbûreden dört sehmi zevce-i mezbûre Neslihan’a ve on dört sehmi oğlu mezbûr Hasan Beşe’ye ve yedişer sehmi kızları mezbûretân Âişe ve İsmihan’dan her birine isâbet ve intikāl eylediği lede’ş-şer‘i’l-enver zâhir ve müte‘ayyen oldukdan sonra mezbûr Hasan Beşe meclis-i şer‘-i şerîf-i enverde bâ‘isü’l-kitâb Hüseyin Çelebi b. Süleyman mahzarında ikrâr ve takrîr-i kelâm edip babam müteveffâ-yı mezbûrun ile’l-vefât yedinde mülk ve hakkı olmağla ba‘de’l-vefât bize mevrûs olup kasaba-i mezbûrede mârrü’z-zikr İmâret mahallesinde vâki‘ bir tarafdan Osman Çelebi menzili ve bir tarafdan Gāzî Mustafa menzili ve bir tarafdan Börekçi Ömer menzili ve bir tarafdan tarîk-i âm ile mahdûd fevkānî iki bâb oda ve bir sofa ve tahtında bir kenîf ve bir su çeşmesi ve bir mikdâr bahçeyi müştemil mülk menzil ve yine kasaba-i mezbûrede Uzun Çarşı sûkunda vâki‘ bir tarafdan Pazarbaşı oğlu el-Hâc İsmail dükkânı ve bir tarafdan Osman Çelebi dükkânı ve bir tarafdan makābir-i Müslimîn ve bir tarafdan tarîk-i âm ile mahdûd bir kepenk nalband dükkânı ile ber-mûceb-i defter-i müfredât eşyâ-i ma‘lûmeden tashîh-i mezkûr üzere on dört sehm hisse-i irsiyemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin merkūm Hüseyin Çelebi’ye on dört bin yüz altmış sekiz akçeye bey‘ ve temlîk ve mahallinde zabt u tasarrufa taslît eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr on dört bin yüz altmış sekiz akçeyi mezbûr Hüseyin Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr ve dükkân-ı merkūmede ve eşyâ-i ma‘lûme-i mezkûrede kat‘an benim alâka ve medhalim kalmayıp mezbûr Hüseyin Çelebi’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Muharremi’l-harâm sene 1153. Şuhûdü’l-hâl: İbrahim b. Abdullah, Arab İbrahim b. İbrahim, Süleyman b. Abdi, İsmail b. Abdullah, İbrahim b. Emrullah, Mustafa b. Abdi, Ahmed b. Süleyman, Ali b. Süleyman, İvaz b. Abdullah