Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 183 Hüküm no: 150 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah Hatun’un evini Abdülkerim Ağa’ya sattığı Mübâya‘a Medîne-i Üsküdar’da Kadıasker mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Nimetullah Hatun bt. el-Hâc Bayram meclis-i şer‘-i şerîf-i âlî-kadrde sâhib-i hâzihi’l-vesîka fahrü’l-emâsil ve’l-akrân Abdülkerim Ağa b. Ahmed muvâcehesinde ikrâr-ı tâm ve takrîr-i kelâm edip zikri câî akdin sudûruna değin yedimde mülk ve hakkım olup mahalle-i merkūmede vâki‘ etrâf-ı erba‘ası Yusuf Beşe ve İbrahim Çelebi ve çorbacı odaları ve Molla Beşir ve Hoca Hatun menzilleri ve tarîk-i âm ile mahdûd hâriciye ve dâhiliyesinde fevkānî dört oda ve bir kilâr ve bir matbah ve bir sofa ve tahtânî ahur ve samânhâne ve üç aded bi’r-i mâ ve hadîkayı müştemil mülk menzilimi alâ mâ yeştemilühû ve yahvîhi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Abdülkerim Ağa’ya bin guruşa bey‘ ve temlîk ve teslîm eylediğimde ol dahi ber-vech-i mübeyyen iştirâ ve temellük ve kabz ve tesellüm ve kabûl edip semen-i mebî‘-i mezbûr bin guruşu müşteri-yi merkūm Abdülkerim Ağa yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp merkūm Abdülkerim Ağa’nın mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Muharremi’l-harâm sene 1153. Şuhûdü’l-hâl: Fahrü’l-müderrisîni’l-kirâm el-Hâc İbrahim Efendi, umdetü’l-meşâyihi’l-kirâm Himmetzâde Şükûrî Efendi, fahrü’l-meşâyihi’l-kirâm Himmetzâde es-Seyyid Mehmed Nurullah Efendi, fahrü’l-müderrisîni’l-kirâm Hıfzı el-Hâc Mehmed Efendi, mefharü’l-meşâyih Hüseyin Efendi Şeyh-i Câmi‘-i Küçük Ayasofya, İmâm Hâfız Mehmed Efendi b. Abdullah, Mustafa Çelebi b. İsmail, Yusuf b. Abdullah, İsmail Çelebi b. Hacı Ali, Mehmed b. Abdullah, Tahtacı Mehmed Çelebi b. Abdullah