Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 185 Hüküm no: 152 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kanalu v. Asmaki’nin Bakkal Osman’a borcu olduğu Sulh Mahmiye-i İstanbul’da Kocamustafapaşa mahallesinde sâkin Bakkāl el-Hâc Osman b. Yusuf nâm kimesne meclis-i şer‘-i şerîf-i enverde bâ‘isü’l-vesîka Kanalu v. Asmaki nâm zimmî muvâcehesinde ikrâr ve takrîr-i kelâm edip mezbûr Kanalu zimmî zimmetinde cihet-i deyn-i şer‘îden yirmi beş guruş ve beher keyli yirmişer paraya olmak üzere altmış keyl şa‘îr semeninden otuz guruş ki cem‘an elli beş guruş hakkım olmağın meblağ-ı mezbûru merkūm Kanalu zimmîden taleb ve da‘vâ sadedinde olup beynimizde münâza‘ât-ı kesîre ve muhâsamât-ı şedîde cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni merkūm Kanalu zimmî ile yirmi beş guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yirmi beş guruşu mesfûr Kanalu zimmî yedinden tamâmen ahz u kabz edip husûs-ı mezbûra müte‘allıka âmme-i da‘vâdan mezbûr Kanalu zimmînin zimmetini ibrâ ve ıskāt eylediğimde ol dahi kezâlik bedel-i sulh-ı mezkûra müte‘allıka âmme-i da‘vâdan benim zimmetimi ibrâ ve ıskāt edip birbirimiz ile vechen mine’l-vücûh da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Muharremi’l-harâm sene 1153. Şuhûdü’l-hâl: es-Seyyid Mustafa b. es-Seyyid Hasan, Süleyman Efendi b. Ahmed, Süleyman Çelebi b. Abdullah, Ahmed Çelebi b. Mustafa, Topal Ahmed Beşe b. Abdullah