Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 185 Hüküm no: 153 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin Hüseyin Çelebi’nin evini Mehmed Ağa’ya sattığı Mübâya‘a Medîne-i hazret-i Ebî Eyüb el-Ensârî -aleyhi rahmetü Rabbühü’l-bârî- mahallâtından Fethi Çelebi mahallesinde sâkin Müezzin Hüseyin Çelebi b. Mahmud nâm kimesne meclis-i şer‘-i hatîr-ı lâzımü’t-tevkīrde bâ‘is-i hâze’l-kitâb Telhîsî el-Hâc Mehmed Ağa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Ali Beşe zevcesi Fâtıma Hatun menzili ve bir tarafdan İmâm el-Hâc Mehmed Efendi menzili ve bir tarafdan Kâhîcioğlu Mehmed Beşe mülkü ve bir tarafdan tarîk-i âm ile mahdûd tahtânî bir bâb oda ve bir sofa ve bir kenîf ve bir mikdâr eşcâr-ı müsmire ve gayr-ı müsmireli bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Telhîsî el-Hâc Mehmed Ağa’ya yüz guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz guruşu mezbûr Telhîsî Hacı Mehmed Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûrda benim alâka ve medhalim kalmayıp mezbûr Telhîsî el-Hâc Mehmed Ağa’nın mülk-i müşterâsı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm sene 1153. Şuhûdü’l-hâl: el-Hâc Mehmed b. Abdullah, Abdullah Efendi tâbi‘-i Telhîsî el-Hâc Mehmed, Hasan Efendi tâbi‘-i el-Hâc Mehmed Ağa, Divriğili Halil Ağa tâbi‘-i el-Hâc Mehmed Ağa