Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 186 Hüküm no: 154 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed’e borcu olan Hoca Mehmed’in parayı varisi olan Mehmed’e ödemesi Bi-imzâ-i efendi İsbât-ı verâset Fi’l-asl diyâr-ı Mağrib’de mahrûse-i Trablus mahallâtından Seydi Salim mahallesi ahâlîsinden olup müste’men sefînesiyle bahren mahmiye-i İstanbul’a gelirken esnâ-i tarîkde cezîre-i Midilli’de işbu târîh-i vesîkadan üç ay mukaddem vefât eden tüccârdan Ahmed b. Kasım b. Süleyman’ın ber-vech-i âtî hasren vârisi olduğunu iddi‘â eden sâhib-i hâze’l-kitâb Mehmed nâm kimesne meclis-i şer‘-i şerîf-i enverde hâlâ fesciler kethüdâsı Hoca el-Hâc Mehmed b. Süleyman mahzarında üzerine da‘vâ ve takrîr-i kelâm edip ben müteveffâ-yı mezbûr Ahmed’in li-ebeveyn karındaşı olup babamız ismi Kasım ve dedemiz ismi Süleyman ve vâlidemiz ismi Hafsiye bt. Said ve maskat-ı re’simiz zikr olunan Seydi Salim mahallesi olup benden gayrı vâris ve terekesine müstahıkk-ı âhar olmayıp ve müteveffâ-yı mezbûrun merkūm el-Hâc Mehmed zimmetinde hubbu’l-lezîz ve Mağrib hurması semeninden doksan üç buçuk guruş hakkı olup kable’l-ahz vefât edip meblağ-ı mezbûr irsen bana isâbet ve intikāl etmeğin hâlâ bi’l-verâse taleb eylediğimde bana edâ ve teslîmden ibâ ve imtinâ‘ eder suâl olunup edâya tenbîh olunmak bi’l-verâse matlûbumdur dedikde gıbbe’s-suâl merkūm el-Hâc Mehmed cevâbında meblağ-ı mezbûr cihet-i mezkûreden ber-vech-i mübeyyen deyni olduğunu ikrâr lâkin müdde‘î-i merkūmun vech-i meşrûh üzere verâsetini ba‘de’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden mahrûse-i Galata’da Arab Câmi‘i mahallesinde sâkin Kıncı Süleyman b. Ahmed ve mahmiye-i mezbûrede Tahtelkale’de sâkin Trablusî Said b. Süleyman ve İbrahim b. Halîfe nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr Mehmed müteveffâ-yı merkūm Ahmed ile li-ebeveyn karındaşlar olup babaları ismi Kasım ve dedeleri ismi Süleyman ve vâlideleri ismi Hafsiye ve maskat-ı re’sleri zikr olunan Seydi Salim mahallesi olup müdde‘î-i mezbûr Mehmed müteveffâ-yı mezbûr Ahmed’in hasren vârisi olup terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm sene 1153. Şuhûdü’l-hâl: el-Hâc Ahmed b. Süleyman, el-Hâc Ramazan b. Mehmed, Ahmed b. Adlunî?, el-Hâc Şa‘bân b. İdris, el-Hâc Mehmed b. Şa‘bân, el-Hâc Mustafa b. Hacı Mehmed