Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 187 Hüküm no: 155 Orijinal metin no: [22a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın Solak Mustafa’daki alacağını vekili Ahmed vasıtasıyla aldığı İsbât-ı vekâlet Medîne-i Mısr-ı Kāhire’de Bâb-ı Züveyle kurbünde Perdağcılar mahallesinde sâkine Âişe bt. Abdullah b. Abdurrahman nâm hatun tarafından ber-vech-i âtî vekâlet iddi‘â eden bâ‘is-i hâzihi’l-vesîka Bursavî el-Hâc Ahmed b. Mustafa nâm kimesne meclis-i şer‘-i şerîf-i enverde Solak Mustafa Çelebi b. el-Hâc Mehmed mahzarında üzerine da‘vâ ve takrîr-i kelâm edip mezbûre Âişe bt. Abdullah b. Abdurrahman nâm hatun merkūm Solak Mustafa Çelebi zimmetinde cihet-i karzdan olan yirmi guruş hakkını merkūm Solak Mustafa Çelebi’den taleb ve da‘vâ ve ahz u kabza ve Arûsî Mehmed Efendi nâm sâhibü’l-hayrın vakfından beher şehr otuz akçe icâre ile taht-ı tasarrufunda olup mahmiye-i İstanbul hısnı ebvâbından Balatkapısı kurbünde Hamamcı Muhyiddin mahallesinde vâki‘ bir tarafdan el-Hâc Ahmed bahçesi ve iki tarafdan mezbûrûn Haraccı Ramazan ve Kavukçu İbrahim menzilleri ve taraf-ı râbi‘i tarîk-i âm ile mahdûd fevkānî bir bâb oda ve bir sofa ve tahtânî bir bâb sagīr oda ve matbah ve kenîf ve havluyu müştemil vakıf menzilini bedel-i misli ve ma‘rifet-i mütevellî-yi vakf-ı mezbûr ile âhara ferâğ ve kabz birle ve bedel-i mezkûru kendüye îsâl ve teslîme [22b] ve bunlar tevakkuf eylediği umûrun küllîsine tarafından beni vekîl ve nâib-i menâb nasb u ta‘yîn ettikde ben dahi ber-vech-i muharrer vekâlet-i mezbûreyi kabûl ve merâsimini mahallinde edâya ta‘ahhüd eylediğim ecilden merkūm Solak Mustafa Çelebi’den meblağ-ı mezbûr yirmi guruşu taleb eylediğimde bana teslîmden imtinâ‘ eder suâl olunup teslîme tenbîh olunmak bi’l-vekâle murâdımdır dedikde gıbbe’s-suâl merkūm Mustafa Çelebi cevâbında müvekkile-i mezbûre Âişe’ye cihet-i mezkûreden zimmetinde edâsı lâzım yirmi guruş deyni olduğunu ikrâr lâkin müdde‘î-i mezbûrun vekâletini ma‘lûmum değildir deyü inkâr edicek müdde‘î-i mezbûr Bursavî el-Hâc Ahmed’den ber-vech-i meşrûh vekâletine beyyine taleb olundukda udûl-ı ahrâr-ı ricâl-i Müslimînden ve medîne-i mezbûre ahâlîsinden olup mahmiye-i merkūmede ticâret vechi üzere müsâfiren sâkinler es-Seyyid İbrahim b. Mehmed ve el-Hâc Ahmed b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka medîne-i Mısr-ı Kāhire’de Bâb-ı Züveyle kurbünde Perdağcılar mahallesinde sâkine Âişe bt. Abdullah b. Abdurrahman nâm hatun merkūm Solak Mustafa Çelebi zimmetinde cihet-i karzdan olan yirmi guruş hakkını mersûm Solak Mustafa Çelebi’nin taleb ve da‘vâ ve ahz u kabza ve Arûsî Mehmed Efendi nâm sâhibü’l-hayrın vakfından beher şehr otuz akçe icâre-i müeccele ile taht-ı tasarrufunda olup mahmiye-i İstanbul hısnı ebvâbından Balatkapısı kurbünde Hamamcı [Muhyi]ddin mahallesinde vâki‘ bir tarafdan el-Hâc Ahmed bahçesi ve iki tarafdan vakf-ı mezbûrdan Haraccı Ramazan ve Kavukçu İbrahim menzilleri ve taraf-ı râbi‘i tarîk-i âm ile mahdûd fevkānî bir bâb oda ve bir sofa ve tahtânî bir bâb sagīr oda ve matbah ve kenîf ve havluyu müştemil vakıf menzilini bedel-i misli ve ma‘rifet-i mütevellî-yi vakf-ı mezbûr ile âhara ferâğa ve kabz-ı bedele ve bedel-i mezkûru kendüye îsâl ve teslîme ve bunların tavakkuf eylediği umûrun küllîsine bizim huzûrumuzda tarafından işbu müdde‘î-i mezbûr Bursavî el-Hâc Ahmed b. Mustafa’yı vekîl ve nâib-i menâb nasb u ta‘yîn ettikde ol dahi ber-vech-i muharrer vekâlet-i mezbûreyi kabûl ve merâsimini mahallinde edâya ta‘ahhüd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh vekîl-i mezbûr Bursavî el-Hâc Ahmed meclis-i mezkûrda merkūm Solak Mustafa Çelebi mahzarında bi’l-vekâle ikrâr ve takrîr-i kelâm edip merkūm Solak Mustafa Çelebi ânifen edâya tenbîh olunan meblağ-ı mezbûr yirmi guruşu bana def‘ ü teslîm ben dahi vekâlet-i mahkiyem hasebiyle yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm sene 1153. Şuhûdü’l-hâl: es-Seyyid Mustafa Ağa b. es-Seyyid Ahmed, es-Seyyid Hüseyin Ağa b. Abdullah, el-Hâc Ali b. Hüseyin, Niğdeli el-Hâc Ahmed b. (°), Abdullah Çelebi b. Mehmed, Salih b. Süleyman