Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 188 Hüküm no: 156 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi’nin evini Halil ve kız kardeşi Ümmühani’ye sattığı Mübâya‘a Mahmiye-i İstanbul’da Akseki mahallesinde mutavattın Osman Çelebi b. Veli nâm kimesne meclis-i şer‘-i hatîr-ı lâzımü’t-tevkīrde sâhibü’l-vesîka kendiden asîl ve li-ebeveyn kız karındaşı Ümmühani bt. Ali b. Ahmed nâm hatun tarafından ikrâr-ı âti’z-zikrde tasdîka vekîl olduğu ber-nehc-i şer‘î sâbit olan Halil nâm kimesne mahzarında bi’t-tav‘i’s-sâf ikrâr ve i‘tirâf edip zikri âtî akdin sudûruna değin yedimde mülk ve hakkım olup mahalle-i mezbûrede vâki‘ bir tarafı benim âhar mülküm ve bir tarafı Bevvâb-ı Sultânî Mustafa Çelebi mülkü ve bir tarafı Osman Bey menzili ve taraf-ı râbi‘i tarîk-i âm ile mahdûd fevkānî bir oda ve tahtında bir oda ve kenîf ve sokak kapısını muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Halil ile kız karındaşı müvekkile-i mezbûre Ümmühani Hatun’a ale’l-iştirâki’s-seviyy yüz doksan guruşa bey‘ ü teslîm ve temlîk eylediğimde onlar dahi vech-i muharrer üzere iştirâken iştirâ ve temellük ve kabz ve kabûl eylediklerinden sonra semen-i mebî‘-i mezbûr yüz doksan guruşu merkūm Halil ve kız karındaşı müvekkile-i mezbûre Ümmühani Hatun yedlerinden tamâmen ve kâmilen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp merkūm Halil ile kız karındaşı müvekkile-i mezbûre Ümmühani Hatun’un ale’l-iştirâki’s-seviyy mülk-i müşterâları olmuşdur keyfe mâ yeşâ‘ûn ve yahtârân mutasarrıf olsunlar dedikde merkūm Halil dahi asâleten ve vekâleten tasdîk etmeğin mâ-vaka‘a bi’t-taleb ketb olundu. Fî 19 min-Muharrem sene 1153. Şuhûdü’l-hâl: el-Hâc Mehmed b. el-Hâc İsmail, Mehmed Çelebi b. Mustafa, Mehmed b. Ahmed, Osman b. Mehmed, Ali b. Hüseyin, Yusuf b. Receb, Mehmed Çelebi tahtacı, es-Seyyid Mustafa Ruhalı, Mehmed b. Eyüb