Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 189 Hüküm no: 157 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un oğlu Mehmed’e nafaka takdiri Nafaka Mahmiye-i İstanbul’da el-Hâc Ferhad mahallesinde sâkine olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Hadîce Hatun bt. Mehmed meclis-i şer‘-i şerîf-i enverde zevc-i sâbıkı Nalçacı Mustafa Çelebi b. Mehmed mahzarında ikrâr ve takrîr-i kelâm edip mezbûr Mustafa Çelebi zevcim olup bundan akdem Mahmud Paşa mahkemesinde nâibü’ş-şer‘ fazîletlü Hüseyin Şakir Efendi huzûrunda mezbûr Mustafa Çelebi’nin yedinde olan hüccet-i şer‘iyyede tafsîl olunduğu vech üzere mehr-i müeccelim ve nafaka-i iddet ve me’ûnet-i süknâm üzerlerine ve mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde olan işbu oğlum Mehmed nâm sagīri dahi hakk-ı hıdâne sukūtuna değin mâlımdan infâk ve iksâ etmek üzere mezbûr Mustafa Çelebi ile muhâla‘a olmuş idim, lâkin ben mu‘dim ve mu‘sir olup sagīr-i mezbûru bir vechile infâk ve iksâya iktidârım olmayıp ve sagīr-i mezbûrun dahi mâlı olmamağla kıbel-i şer‘den mezbûr Mustafa Çelebi üzerine kadr-ı ma‘rûf nafaka takdîr olunmasını taleb eylediğimde ol dahi yesârımı da‘vâ etmekle beynimizde ba‘de’l-münâza‘a muslihûn tavassutuyla mezbûr Mustafa Çelebi sagīr-i mezbûrun nafaka ve kisvesi’çün bana yevmî iki para vermek üzere râzı oldukda ben dahi kabûl eyledim dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi ber-vech-i muharrer mezbûr Mustafa Çelebi üzerine târîh-i kitâbdan bi’t-terâzi yevmî iki para farz ve takdîr edip meblağ-ı mefrûz-ı mezbûru sagīr-i mezbûr Mehmed’in nafaka ve kisve-bahâ ve sâir havâyic-i lâzımesine harc ü sarfa ve lede’l-iktizâ istidâneye ve inde’z-zafer babası mezbûr Mustafa Çelebi üzerine rücû‘a mezbûre Hadîce Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Muharremi’l-harâm sene 1153. Şuhûdü’l-hâl: es-Seyyid Abdullah b. (°), Hüseyin Çelebi b. Mehmed, Salih b. Süleyman, Mehmed b. Abdullah