Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 190 Hüküm no: 158 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa’nın evini İbrahim Efendi’ye sattığı Mübâya‘a Hilâl-i sütûrda mastûr husûsun mahallinde ketb ü tahrîri için bi’l-iltimâs savb-ı şer‘-i enverden irsâl olunan Mevlânâ Bostanzâde es-Seyyid Ahmed Efendi mahmiye-i İstanbul hısnı ebvâbından Edirnekapısı kurbünde Ali Paşa-i atîk mahallesi ahâlîsinden Dergâh-ı âlî -dâme mahfûfen bi’l-me‘âlî- yeniçerileri kaleminde ser-hulefâ olan mefharü erbâbi’t-tahrîr ve’l-kalem zübdetü ashâbi’t-tastîr ve’r-rakam İbrahim Efendi b. Hüseyin’in sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre ahâlîsinden fahrü’l-akrân Salih Ağa b. Mustafa b. Abdurrahman nâm kimesne meclis-i ma‘kūd-ı mezkûrda bâ‘isü’l-kitâb mûmâ-ileyh İbrahim Efendi mahzarında ikrâr ve takrîr-i kelâm edip arsası mûmâ-ileyhin mülkü ve üzerinde mevcûd ebniyesi zikri âtî akdin sudûruna değin yedimde mülk ve hakkım olup mahalle-i mezbûrede vâki‘ bir tarafdan mûmâ-ileyh İbrahim Efendi’nin âhar menzili ve bir tarafdan Süleyman nâm kimesne menzili ve iki tarafdan tarîk-i âm ile mahdûd fevkānî üç bâb oda ve bir sofayı müştemil menzilin ebniye-i memlûkesini cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh İbrahim Efendi’ye iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm ve kabûl eylediğinden sonra semeni olan meblağ-ı mezbûr iki yüz elli guruş mutâlebesine müte‘allıka âmme-i de‘âvî ve kâffe-i mutâlebât ve eymândan mûmâ-ileyh İbrahim Efendi’nin zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim fîmâ-ba‘d ebniye-i mezkûrede kat‘â benim alâka ve medhalim kalmayıp menzil-i mahdûd-ı mezkûrun ebniye ve arsası mûmâ-ileyh İbrahim Efendi’nin mülk ve hakkı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Salih b. Süleyman ve Süleyman b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Muharremi’l-harâm sene 1153. Şuhûdü’l-hâl: el-Hâc Abdurrahman b. Abdüllatif, Ali Efendi b. İbrahim, Mehmed Efendi b. İbrahim, Çukadâr Mehmed Beşe b. Murtaza, İshak Çelebi b. Mustafa, İsmail b. Hacı Mehmed, Mustafa b. Mehmed, Çukadâr Lütfullah b. Hasan, Süleyman b. Abdullah, Ali b. Ahmed