Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 191 Hüküm no: 159 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin bazı eşyalarını kızı Ayşe’ye sattığı Mübâya‘a-i eşyâ Kezâlik meclis-i ma‘kūd-ı mezkûrda sulbiye kebîre kızı olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Âişe nâm hatun mahzarında ikrâr-ı tâm ve takrîr-i kelâm edip eşyâ-i memlûkemden bir pîştahta sâ‘ati ve bir sedefli pîştahta ve bir kırmızı çukaya kaplı köhne samur kürk ve bir şal kuşak ve bir sarı çukaya kaplı sincab kürk ve yeşil çukaya kaplı köhne çilkafa kürk ve iki müsta‘mel çuka dolama ve bir yeşil çuka âbdest nîmteni ve iki çuka çakşır ve iki müsta‘mel destâr ve on kadife yasdık ve altı minder ve üç çuka mak‘ad ve bir orta keçesi ve üç beledî döşek ve altı yemenî yorgan ve beş tencere ma‘a kapak ve on sahan ve iki tepsi ve bir leğen ma‘a ıbrık ve bir sagīr leğen ma‘a ıbrık ve dört kahve ıbrığı ve bir sagīr leğenimi tarafeynden îcâb ve kabûlü hâvî bey‘-i bâtt-ı sahîh-i şer‘î ile kızım mezbûre Âişe Hatun’a bi-safkatin vâhidetin yüz guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğimden sonra semeni olan meblağ-ı mezbûr yüz guruş mutâlebesine müte‘allıka âmme-i da‘vâdan kızım mezbûre Âişe Hatun’un zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim ba‘de’l-yevm eşyâ-i muharrere-i mezkûrede kat‘an benim alâka ve medhalim kalmayıp kızım mezbûre Âişe Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Salih Çelebi b. Süleyman ve Süleyman b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 16 Muharrem sene 1153. Şühedâ eş-şâhidûnü’s-sâbikūn