Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 191 Hüküm no: 160 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un bazı eşyalarını kızı Ayşe’ye sattığı Mübâya‘a-i eşyâ Kezâlik zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre sâkinelerinden olup zâtı Ali Efendi b. İbrahim ve İshak Çelebi b. Mustafa ta‘rîfleriyle mu‘arrefe olan Hanife bt. Mehmed Efendi meclis-i ma‘kūd-ı mezkûrda sulbiye kebîre kızı olup zâtı kezâlik mu‘arrifân-ı mezbûrân ta‘rîfleriyle mu‘arrefe olan bâ‘isetü hâzihi’l-vesîka Âişe bt. Salih Ağa mahzarında ikrâr-ı tâm ve takrîr-i kelâm edip eşyâ-i memlûkemden yirmi miskāl bir altın kuşak ve yirmi miskāl bir çift altın bilezik ve bir çift zümrüd küpe ve bir sagīr sîm kuşak ve bir müsta‘mel çuka kaplı bütün kürk ve iki müsta‘mel kutnî anteri ve bir müsta‘mel Ankûrî çuka ferâcemi tarafeynden îcâb ve kabûlü hâvî mevânî‘-i müfsideden ârî bey‘-i bâtt-ı sahîh-i şer‘î ile bi-safkatin vâhidetin kızım mezbûre Âişe Hatun’a iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz elli guruş mutâlebesine müte‘allıka âmme-i da‘vâdan kızım mezbûre Âişe Hatun’un zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim fîmâ-ba‘d eşyâ-i muharrere-i mezkûrede kat‘an benim alâka ve medhalim kalmayıp kızım mezbûre Âişe Hatun’un mülk-i müşterâsı ve hakk-ı sırfı olmuşdur ve keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Salih Çelebi b. Süleyman ve Süleyman b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 16 min-Muharremi’l-harâm sene 1153. Eş-şâhidûnü’s-sâbikūn