Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 192 Hüküm no: 161 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Ali Ağa’nın evini Şerife Ümmügülsüm Hatun’a sattığı Mübâya‘a Mahmiye-i İstanbul’da Kırkçeşme kurbünde Sekbanbaşı İbrahim Ağa mahallesinde sâkin Çorbacı es-Seyyid Ali Ağa b. Salih b. Mehmed nâm kimesne tarafından bey‘-i âti’z-zikri ikrâra vekîl olduğu Osman b. Mustafa ve Mustafa Ağa b. Mehmed nâm kimesneler şehâdetleriyle sâbit olan es-Seyyid Yakub Efendi b. es-Seyyid el-Hâc Ahmed nâm kimesne meclis-i şer‘-i hatîr-ı lâzımü’t-tevkīrde bâ‘isetü hâzihi’l-vesîka Şerife Ümmügülsüm bt. es-Seyyid Hasan nâm hatun muvâcehesinde bi’l-vekâle ikrâr ve takrîr-i kelâm edip müvekkil-i merkūm es-Seyyid Ali Ağa’nın akd-i âti’z-zikrin sudûruna değin yedinde mülk ve hakkı olup mahmiye-i mezbûrede Koruk Mahmud mahallesinde vâki‘ bir tarafdan Ebubekir Çavuş mülkü ve bir tarafdan Abdullah Bey mülkü ve bir tarafdan ba‘zan Halil Çavuş ve ba‘zan el-Hâc Ali Çavuş mülkleri ve bir tarafdan tarîk-i âm ile mahdûd dâhiliyede tahtânî iki bâb oda ve bir kilâr ve bir matbah ve bir su kuyusu ve bir kenîf ve eşcâr-ı müsmire ve gayr-ı müsmireli bahçe ve hâriciyede fevkānî iki bâb oda ve bir sofa ve dehliz ve tahtında bir ahur ve bir kenîf ve bir mikdâr havluyu müştemil mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Şerife Ümmügülsüm Hatun’a üç yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğimden sonra semeni olan meblağ-ı mezbûr üç yüz guruşu merkūme Şerife Ümmügülsüm Hatun yedinden tamâmen ahz u kabz eyledi ba‘de’l-yevm menzil-i mahdûd-ı mezkûrda müvekkil-i merkūm es-Seyyid Ali Ağa’nın kat‘an alâka ve medhali kalmayıp mezbûre Şerife Ümmügülsüm Hatun’un mülk-i müşterâsı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-Muharrem sene 1153. Şuhûdü’l-hâl: Sandalcı Mehmed Çelebi b. Ali, Ahmed Çelebi b. Hacı Mehmed [23b] Osman Bey b. Mustafa, Ebubekir Çavuş b. Abdullah, Ahmed Çavuş b. Mustafa, İbrahim Çavuş b. Bali, el-Hâc Süleyman b. Mustafa, Yusuf Efendi b. Hacı Mehmed