Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 193 Hüküm no: 162 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin cariyesi Maksud’u azat ettiği Itâknâme Mahmiye-i İstanbul’da Kiçi Hatun mahallesinde sâkin Abdullah Çelebi b. Musli nâm kimesne meclis-i şer‘-i hatîr-ı lâzımü’t-tevkīrde kendüye rıkkıyetini mu‘terife olan orta boylu, elâ gözlü, açık kaşlı, Gürciyyetü’l-asl, Müslimetü’l-millet câriye-i memlûkesi Maksud bt. Abdullah muvâcehesinde ikrâr ve takrîr-i kelâm edip mevsûfe-i mezbûre Maksud’u hasbeten lillâhi’l-Meliki’l-Hallâk ve taleben li-merzâti Rabbi’r-Rezzâk mâlımdan tahrîr ü i‘tâk ve sâir harâir-i asliyât zümresine idrâc ü ilhâk eyledim ba‘de’l-yevm mevsûfe-i mezbûre sâir harâir-i asliyât gibi hür olup üzerinde velâ-i şer‘îden gayrı hakkım kalmadı dedikde gıbbe’t-tasdîkı’ş-şer‘î mezbûr Abdullah Çelebi ile mezbûre Maksud’un beynlerinde ma‘lûm birbirinden müdde‘âları olan husûslara ve târîh-i kitâba gelince sâir hukūk-ı ma‘lûme ve mechûleye müte‘allıka âmme-i da‘vâdan her biri âharın zimmetini ibrâ ve ıskāt etmeğin mâ-vaka‘a bi’t-taleb ketb olundu. Fî 15 min-Muharremi’l-harâm sene 1153. Şuhûdü’l-hâl: Mehmed Çelebi b. Abdullah, Ahmed Ağa b. Mehmed, es-Seyyid Mustafa b. es-Seyyid Hasan, el-Hâc Mustafa b. Hacı Mehmed, Molla Hüseyin du‘âcı