Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 193 Hüküm no: 163 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah’ın boşandığı kocası Osman Çelebi’nin, oğlu Ömer’i almaması şartıyla nafakadan vazgeçtiği Nafaka Mahmiye-i İstanbul’da Zincirlikuyu kurbünde Ali Paşa-i atîk mahallesinde sâkine işbu bâ‘isü’l-vesîka Emetullah bt. Mustafa nâm hatun zâtı ba‘de’t-ta‘rîfi’ş-şer‘î meclis-i şer‘-i hatîr-ı lâzımü’t-tevkīrde zevc-i sâbıkı Osman Çelebi b. Ömer nâm kimesne mahzarında ikrâr-ı tâm ve takrîr-i kelâm edip mezbûr Osman Çelebi ile zevciyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde sadrî oğlu Ömer nâm sagīrin nafaka ve kisvesi için babası mezbûr Osman Çelebi üzerine yevmî sekiz akçe nafaka farz ve takdîr olunup kıbel-i şer‘den yedime işbu hüccet-i şer‘iyye i‘tâ olunmuş idi, lâkin ben sagīr-i mezbûr Ömer’i hakk-ı hıdânesi sukūtuna değin kendi mâlımdan infâk ve iksâ eyleyip babası mezbûr Osman Çelebi’den nafaka taleb etmemek üzere ta‘ahhüd eylediğimde ol dahi sagīr-i mezbûr Ömer’i hakk-ı hıdânesi sukūtuna değin yedimden nez‘ etmemeğe ta‘ahhüd eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Muharremi’l-harâm sene 1153. Şuhûdü’l-hâl: Halil b. İsmail, Mehmed Çelebi b. Abdullah, Abdullah Çelebi b. Halil, el-Hâc İbrahim b. el-Hâc Ali, Ahmed Çelebi b. Hasan, Hasan Çelebi b. Mehmed ve gayruhum