Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 196 Hüküm no: 166 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdülvahid’in vefatından önce Mehmed b. Mehmed’i vasi tayin ettiği Bi-imzâ-i efendi İsbât-ı vesâyet Fi’l-asl diyâr-ı Mağrib’de mahrûse-i Trablus’da Kapudan Câmi‘i mahallesi ahâlîsinden olup müste’men sefînesiyle bahren mahmiye-i İstanbul’a gelirken esnâ-i tarîkde cezîre-i Midilli’de târîh-i vesîkadan üç ay mukaddem vefât eden Mehmed b. Abdülvahid b. Abdullah’ın ber-vech-i âtî vasiyy-i muhtârı olduğunu iddi‘â eden sâhib-i hâzihi’l-vesîka Mehmed b. el-Hâc Mehmed nâm kimesne meclis-i şer‘-i şerîf-i enverde el-Hâc Ahmed b. el-Hâc Ramazan nâm kimesne mahzarında üzerine da‘vâ ve takrîr-i kelâm edip mezbûr Mehmed vefâtından üç gün mukaddem bi-emrillâhi te‘âlâ vefât eylediğimde cemî‘ terekemi ve zimem-i nâsda olan hukūkumu cem‘ ü tahsîl ve ahz u kabz ve sünnet-i seniyye üzere techîz ü tekfînim ve levâzım-ı defnim görüldükden sonra tereke-i bakiyem mahalle-i mezbûrede hasren vârislerim olan zevcem Âişe’ye ve sulbî oğlum Mehmed’e îsâl oluna deyü vasiyet ve vesâyâ-yı mezkûresini tenfîze mahzar-ı şuhûdda beni vasiyy-i muhtâr nasb ve ihtiyâr eylediğinde ben dahi vesâyet-i mezkûreyi kabûl ve hizmet-i lâzımesini edâya ta‘ahhüd ve iltizâm edip mezbûr Mehmed musırran alâ-îsâihî vefât etmiş idi, el-hâletü hâzihi müteveffâ-yı mezbûrun mezbûr el-Hâc Ahmed zimmetinde Gürciyyetü’l-asl Rahime nâm câriye semeninden hakkı olan yüz on guruşu bi’l-vesâye bana teslîme merkūm el-Hâc Ahmed’e tenbîh olunmak matlûbumdur suâl olunsun dedikde gıbbe’s-suâl merkūm el-Hâc Ahmed cevâbında deyn-i mezbûru ikrâr lâkin müdde‘î-i mezbûrun vesâyet-i mezkûresini ba‘de’l-inkâr müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden Said b. Süleyman ve İbrahim b. el-Halîfe el-Kazvinî nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed b. Abdülvahid b. Abdullah vefâtından üç gün mukaddem bi-emrillâhi te‘âlâ vefât eylediğimde cemî‘ terekemi ve zimem-i nâsda olan hukūkumu cem‘ ü tahsîl ve ahz u kabz ve sünnet-i seniyye üzere techîz ve tekfînim ve levâzım-ı defnim görüldükden sonra tereke-i bakiyem mahalle-i mezbûrede hasren vârislerim olan zevcem Âişe ve sulbî oğlum Mehmed’e îsâl oluna deyü vasiyet ve vesâyâ-yı mezkûresini tenfîze bizim huzûrumuzda işbu müdde‘î-i mezbûr Mehmed’i vasiyy-i muhtâr nasb ve ihtiyâr eylediğinde ol dahi ber-vech-i muharrer vesâyet-i mezkûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm edip mezbûr Mehmed musırran alâ-îsâihî vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm sene 1153. Şuhûdü’l-hâl: el-Hâc Ahmed b. Süleyman, el-Hâc Ramazan b. Mehmed, Ahmed b. Adlunî?, el-Hâc Şa‘bân b. İdris, el-Hâc Mehmed b. Şa‘bân, el-Hâc Mustafa b. Hacı Mehmed