Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 197 Hüküm no: 167 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabiha bt. Osman’ın Çorbacı Ali Ağa’dan boşanarak zimmetini ibra ettiği Ahz u kabz, ibrâ Mahmiye-i İstanbul’da Koruk Mahmud mahallesinde sâkine olup zâtı İmâm Hüseyin Efendi Yakub ve el-Hâc Süleyman b. Mustafa nâm kimesneler ta‘rîfleriyle mu‘arrefe olan Sabiha bt. Osman nâm hatun meclis-i şer‘-i hatîr-ı lâzımü’t-tevkīrde zevc-i sâbıkı bâ‘is-i hâze’l-kitâb Çorbacı es-Seyyid Ali Ağa b. Salih b. Mehmed tarafından husûs-ı âti’z-zikri tasdîka vekîl olduğu Osman Bey b. Mustafa ve Mustafa Ağa b. Mehmed şehâdetleriyle sâbit olan es-Seyyid Yakub Efendi b. es-Seyyid el-Hâc Ahmed nâm kimesne mahzarında ikrâr ve takrîr-i kelâm edip müvekkil-i merkūm es-Seyyid Ali Ağa bundan akdem beni bâyinen tatlîk etmekle zimmetinde mütekarrer ve ma‘kūdün-aleyh bin akçe mehr-i müeccelim ve nafaka-i iddet-i meûnet-i süknâm için dahi bi’t-terâzi ta‘yîn olunan beş yüz akçe ki cem‘an bin beş yüz akçeyi ve beynimizde cârî olan mu‘âmelâtımız için dahi bin yüz kırk akçe min-haysü’l-mecmû‘ iki bin altı yüz kırk akçeyi mezbûr es-Seyyid Ali Ağa tamâmen bana edâ ve teslîm ben dahi ber-vech-i muharrer yedinden bi’t-tamâm ve’l-kemâl ahz u kabz edip hukūk-ı zevciyete ve sâire müte‘allıka târîh-i kitâba gelince âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-Muharremi’l-harâm sene 1153. Şuhûdü’l-hâl: Ahmed b. Hacı Mehmed, Ebubekir Çavuş b. Abdullah, Sandalcı Mehmed b. Ali, Ahmed Çavuş b. Mustafa, Yusuf Efendi b. Hacı Mehmed, İbrahim Çavuş b. Bali