Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 197 Hüküm no: 168 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin vefatıyla çocuklarına kalan vakıf evin devrine izin verildiği Ferâğa izin Mahmiye-i İstanbul’da Sofular mahallesi sükkânından iken bundan akdem vefât eden Mustafa Beşe b. Abdullah’ın sagīr oğulları Hüseyin ve Mehmed’in vâlideleri ve bâ-hüccet-i şer‘iyye mansûb vasîleri olup zâtı ta‘rîf-i şer‘î ile mu‘arrefe olan râfi‘at-i hâzihi’l-vesîka Hadîce bt. Abdullah nâm hatun meclis-i şer‘-i hatîr-ı lâzımü’t-tevkīrde bi’l-vesâye takrîr-i kelâm ve bast-ı merâm edip Müneccimbaşı Vakfı müsakkafâtından olup mahalle-i merkūmede vâki‘ bir tarafı Orta Câmi‘i imâmı menzili ve bir tarafdan Kuzuoğlu Mustafa Ağa menzili ve bir tarafı Kargazâde veresesi menzili ve bir tarafı tarîk-i âm ile mahdûd ma‘lûmü’l-müştemilât vakıf menzil merkūm Mustafa Beşe’nin ile’l-vefât yedinde ve tasarrufunda bi’l-icâreteyn olup ba‘de vefâtihî intikāl-i âdî ile sagīrân-ı merkūmâna intikāl etmiş idi, lâkin menzil-i mahdûd-ı mezkûr müşrif-i harâb ve mâil-i türâb ve hâsılı harcına vefâ etmemekle menzil-i mezkûr bedel-i misli ve ma‘rifet-i mütevellî ile âhara ferâğ ve bedel-i mezkûr istirbâh olunup hâsıl olan nemâsıyla sagīrân-ı merkūmân infâk ve iksâ olunmak her vechile haklarında hayr-ı mahz olmağla hakīkat-i hâli işbu hâzırûn bi’l-meclis Müslimînden ba‘de’l-istihbâr kıbel-i şer‘den vech-i muharrer üzere bana izin verilmek bi’l-vesâye matlûbumdur dedikde kazıyye vasiye-i merkūme Hadîce’nin takrîri üzere olduğunu zeyl-i vesîkada isimleri mastûr sikāt-ı sahîhatü’l-kelimât Müslimîn alâ-tarîkı’ş-şehâde haber vermeleriyle mûcebince menzil-i mahdûd-ı mezkûru bedel-i misli ve ma‘rifet-i mütevellî ile âhara ferâğa vasiye-i merkūme Hadîce Hatun’a izin verilmeğin mâ-vaka‘a bi’t-taleb ketb olundu. Fî 22 min-Muharrem sene 1153. Şuhûdü’l-hâl: Mehmed Ağa b. Ahmed, İsmail Ağa b. Ahmed, el-Hâc Mustafa b. Ahmed, Mehmed b. Mustafa, Mehmed Ağa b. Ebubekir, Mehmed b. Abdullah, es-Seyyid Mustafa Ruhalı, Ahmed b. Hasan