Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 198 Hüküm no: 169 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş’un varislerinden hanımı Ayşe ile kızı Hatice arasındaki davaya sulh bedeli karşılığı son verildiği Sulh Mahmiye-i İstanbul’da Fethiye Câmi‘-i şerîfi kurbünde Kâtib Muslihiddin mahallesinde sâkin iken bundan akdem fevt olan Ahmed Çavuş b. Abdullah b. Abdurrahman’ın verâseti zevce-i menkûha-i metrûkesi Âişe bt. İbrahim ile sulbiye kebîre kızları Âişe ve Hadîce’ye münhasıra ve tashîh-i meselesi on altı sehmden olup sihâm-ı mezbûreden iki sehmi zevcesi mezbûre Âişe’ye ve yedişer sehmi mezbûretân Âişe ve Hadîce’den her birine isâbeti mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Hadîce Hatun meclis-i şer‘-i hatîr-ı lâzımü’t-tevkīrde üvey vâlidesi bâ‘isetü’l-kitâb mezbûre Âişe Hatun muvâcehesinde ikrâr ve takrîr-i kelâm edip mûrisimiz müteveffâ-yı mezbûrun terekesinden ber-mûceb-i defter-i müfredât kıymetleri beynimizde ma‘lûm on sahan ve iki minder ve on bir penbe yasdık ve üç yorgan ve bir leğen ıbrık ve iki Cezâyir ihrâmı ve bir kebe ve bir fener ve bir hoşâb tası ve bir keçe ve bir deve sandığı ve bir destâr kutusu ve bir sırmalı matara ve yirmi aded baga kaşığı bi-gayr-ı hakkın ketm ü ihfâ eyledin hâlâ eşyâ-i mezkûreden hisse-i mezkûremi mezbûre [24b] Âişe Hatun’dan taleb ve da‘vâ sadedinde olup beynimizde münâza‘ât-ı kesîre cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni üvey vâlidem mezbûre Âişe Hatun ile yüz seksen akçe üzerine sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr yüz seksen akçeyi mezbûre Âişe Hatun yedinden tamâmen ahz u kabz edip husûs-ı mezkûra müte‘allıka âmme-i de‘âvî ve kâffe-i mutâlebâtdan üvey vâlidem mezbûre Âişe Hatun’un zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Muharrem sene 1153. Şuhûdü’l-hâl: Mustafa Çavuş b. Abdullah, Süleyman b. Ahmed, Mustafa b. Mehmed, Kayıkcı Mustafa, Abdullah b. Mehmed