Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 199 Hüküm no: 170 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Samol’a borcu olan Anaştaş’ın parayı varisleri Agasti ve Lanbolos’a ödediği İsbât-ı verâset Fi’l-asl vilâyet-i Anadolu’da Ürgüb kazâsına tâbi‘ Zeli [Zalela] nâm karye ahâlîsinden olup mahrûse-i Galata’da Karakikapısı kurbünde mütemekkinler ve ber-vech-i âtî iddi‘â-i verâset eden bâ‘iseyü’r-rakīm Agasti v. Mihal ve Lanbo[lo]s v. Nikola nâm zimmîler meclis-i şer‘-i hatîr-ı lâzımü’t-tevkīrde Anaştaş v. Paskal nâm zimmî muvâcehesinde her biri üzerine da‘vâ ve takrîr-i kelâm edip mahmiye-i İstanbul hısnı ebvâbından Eğrikapı kurbünde Avcıbey mahallesinde mütemekkin iken bundan akdem katîlen hâlik olan Samol zimmînin babası Simyon bizim babalarımız Mihal ve Nikola ile li-ebeveyn karındaşlar olup babaları ismi Korba ve dedeleri ismi Garib ve anaları ismi Satı bt. Mihal ve maskat-ı re’sleri mesbûku’z-zikr Zeli karyesidir, hâlik-i mesfûrun verâseti usûbet-i nesebiye cihetinden bizlere ve karye-i mezkûrede mütemekkineler zevcesi Agafile bt. Yorgi ve anası Gülistan bt. Loka Nasrâniyelere münhasıra olup bizlerden gayrı vârisi ve terekesine müstahıkk-ı âharı olmamağla hâlik-i mesfûr Samol’un mersûm Anaştaş zimmetinde cihet-i karzdan yirmi guruş hakkı olmağla meblağ-ı mezbûrdan hisse-i irsiyemizi mersûm Anaştaş’dan taleb ederiz suâl olunup bize edâya mersûm Anaştaş’a tenbîh olunmak bi’l-verâse murâdımızdır dediklerinde gıbbe’s-suâl mersûm Anaştaş cevâbında hâlik-i mesfûra cihet-i merkūmeden zimmetinde yirmi guruş deyni olduğunu ikrâr lâkin müdde‘iyân-ı mezbûrânın verâsetini ma‘lûmum değildir deyü inkâr edicek müdde‘iyân-ı mezbûrândan ber-vech-i muharrer müdde‘âsına beyyine taleb olundukda karye-i mezbûre ahâlîsinden olup mahmiye-i mezbûrede Hoca Gıyaseddin mahallesinde sâkin Ali Beşe b. Musli nâm kimesne ile mahrûse-i Galata’da Karakikapısı’nda mütemekkinler Kostandi v. Tarfanos ve Liko v. Lagter nâm zimmîler li-ecli’ş-şehâde meclis-i şer‘a hâzırûn olup istişhâd olunduklarında fi’l-asl vilâyet-i Anadolu’da Ürgüb kazâsına tâbi‘ Zeli nâm karye ahâlîsinden olup mahmiye-i İstanbul hısnı ebvâbından Eğrikapı kurbünde Avcıbey mahallesinde mütemekkin iken bundan akdem hâlik olan Samol zimmînin babası Simyon işbu müdde‘iyân Agasti ve Lanbolos zimmîlerin babaları Mihal ve Nikola ile li-ebeveyn karındaşlar olup babaları ismi Korba ve dedeleri ismi Garib ve anaları ismi Satı bt. Mihal ve maskat-ı re’sleri mesbûku’z-zikr Zeli karyesidir, hâlik-i mesfûrun verâseti usûbet-i nesebiye cihetinden müdde‘iyân-ı mezbûrâna ve karye-i mezbûrede mütemekkineler zevcesi Agafile bt. Yorgi ve anası Gülistan bt. Loka nâm Nasrâniyelere münhasıra olup bunlardan gayrı vârisi ve terekesine müstahıkk-ı âharı olduğu ma‘lûmumuz değildir, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mesfûrân Agasti ve Lanbolos zimmîler meclis-i mezkûrda mersûm Anaştaş muvâcehesinde her biri bi’l-verâse ikrâr ve takrîr-i kelâm edip meblağ-ı mezbûrdan ânifen edâsına tenbîh olunan hisse-i irsiye-i ma‘lûmemizi mersûm Anaştaş bize def‘ ü teslîm ettikde biz dahi yedinden tamâmen ahz u kabz eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Muharrem sene 1153. Şuhûdü’l-hâl: Mehmed Ağa b. Abdullah, el-Hâc Mustafa b. Hacı Mehmed, es-Seyyid Mustafa b. es-Seyyid Hasan, Ahmed b. Şa‘bân, Hüseyin b. Hacı Mehmed, Ali b. Abdullah, Acem Ali b. Ahmed