Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 200 Hüküm no: 171 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hatun’dan çocuklarına kalan vakıf evin satılmasına izin verildiği Ferâga izin Mahmiye-i İstanbul’da Kırkçeşme kurbünde Sekbanbaşı İbrahim Ağa mahallesinde sâkine iken bundan akdem vefât eden Fâtıma bt. Mustafa b. Abdullah’ın sadrî sagīr oğlu Mustafa b. Ali’nin li-üm er karındaşı ve kıbel-i şer‘-i enverden vasiyy-i mansûbu olan işbu bâ‘isü’l-vesîka Ahmed b. Mehmed nâm kimesne meclis-i şer‘-i hatîr-ı lâzımü’t-tevkīrde bi’l-vesâye takrîr-i kelâm ve ta‘bîr ani’l-merâm edip merhûm Sekbanbaşı Hüseyin Ağa Vakfı müsakkafâtından olup mahalle-i mezbûrede vâki‘ bir tarafdan Nuri Efendi menzili ve bir tarafdan el-Hâc Hüseyin menzili ve bir tarafdan Molla Abdülkerim menzili ve bir tarafdan tarîk-i hâs ile mahdûd ma‘lûmü’l-müştemilât vakıf menzil müteveffiye-i mezbûre Fâtıma’nın ile’l-vefât icâreteyn-i ma‘lûmeteyn ile taht-ı tasarrufunda olup ba‘de vefâtihâ nısf-ı bana nısf-ı âharı sagīr-i mezbûr Mustafa’ya intikāl-i âdî ile intikāl etmiş idi, lâkin menzil-i mezkûr müşrif-i harâb olup ve nısf hisse-i mezkûrun hâsılı harcına vefâ etmeyip ve sagīr-i mezbûrun dahi ta‘mîr ü termîme iktidârı olmadığından mâ‘adâ ben nısf hissemi âhara ferâğ murâd eylediğimde zikr olunan menzilde sagīr-i mezbûr Mustafa’nın nısf hissesini ifrâz mümkün olmamağın sagīr-i mezbûrun hissesi benim hissem ile ma‘an bedel-i misli ve ma‘rifet-i mütevellî ile âhara ferâğ ve tefvîz edip ve bedel-i ferâğı istirbâh ve istiğlâl olunup galle ve nemâsıyla sagīr-i mezbûr infâk ve iksâ olunmak her vechile hakkında enfa‘ olmağla hakīkat-i hâl işbu hâzırûn bi’l-meclis Müslimînden ba‘de’l-istihbâr kıbel-i şer‘den ber-vech-i muharrer bana izin verilmek matlûbumdur dedikde kazıyye vasiyy-i mezbûr Ahmed’in takrîri üzere olduğunu zeyl-i kitâbda isimleri mastûr bî-garaz Müslimîn alâ-tarîkı’ş-şehâde haber vermeleriyle mûcebince vasiyy-i mezbûr Ahmed’e vech-i muharrer üzere âhara ferâğa izin birle mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Muharremi’l-harâm sene 1153. Şuhûdü’l-hâl: Mustafa Efendi b. Mehmed, el-Hâc İbrahim b. Mehmed, Nurullah Efendi b. İbrahim, es-Seyyid el-Hâc Ahmed b. Hacı Mustafa, Molla Hüseyin b. Mehmed, Mehmed b. Abdullah, Du‘âcı Molla Hüseyin, Mehmed b. İbrahim