Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 201 Hüküm no: 172 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin Halil Kapudan’daki alacağını tahsil etmek üzere Mustafa Efendi’yi vekil tayin ettiği Vekâlet Müderrisîn-i kirâm-ı zevi’l-ihtirâmdan Ahmed Efendi b. Mehmed Emin Efendi b. Mehmed meclis-i şer‘-i hatîr-ı lâzımü’t-tevkīrde işbu bâ‘isü’l-vesîka Mustafa Efendi b. Musa muvâcehesinde ikrâr-ı tâm ve takrîr-i kelâm edip bundan akdem medîne-i İzmir’de mutavattın Mısırlı Halil Kapudan yedinden Gürcü cinsinden olmak üzere iki yüz altmış guruş semen-i medfû‘ ve makbûza iştirâ eylediğim uzun boylu, kara kaşlı, kara gözlü, Müslimetü’l-millet Emine bt. Ali huzûr-ı hâkimü’ş-şer‘de Ada ahâlîsinden olup hürretü’l-asl olduğunu muvâcehemde ba‘de’d-da‘vâ ve’l-isbât ve’l-hükm mevsûfe-i mezbûrenin şer‘an sebîli tahliye ve kasr-ı yedime tenbîh olundukdan sonra ben dahi mevsûfe-i mezbûrenin semeni olmak üzere merkūm Halil Kapudan’ın makbûzu olan iki yüz altmış guruşu merkūm Halil Kapudan’dan bi’l-mürâca‘a taleb ve da‘vâ ve ahz u kabza ve lede’l-iktizâ sulh ve ibrâya ve bana îsâl ve teslîm ve bunların mütevakkıf olduğu umûrun küllîsine tarafımdan mezbûr Mustafa Efendi’yi vekîl ve nâib-i menâb nasb u ta‘yîn eylediğimde ol dahi ber-vech-i muharrer vekâlet-i merkūmeyi kabûl ve hıdemât-ı lâzımesini mahallinde edâya ta‘ahhüd ve iltizâm eyledi dedikde [25a] gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Muharremi’l-harâm sene 1153. Şuhûdü’l-hâl: Memiş b. Mustafa, Molla Mehmed b. Abdülbaki, Mehmed b. Abdullah, Abdurrahman b. Abdullah