Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 202 Hüküm no: 173 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Ohan’ın hamile olan Sofya’yı dövüp çocuğunu düşürmesinden dolayı açılan davaya sulh bedeli karşılığı son verildiği Sulh Mahmiye-i İstanbul’da Kâtibkasım mahallesinde mütemekkin Yorgi v. (°) nâm zimmî asâleten ve zevcesi Sofya bt. Darador v. Yorgi nâm Nasrâniye tarafından sulh-ı câi’z-zikre vekîl olduğu şahs-ı mezbûreyi bi’l-ma‘rifeti’ş-şer‘iyye ârifân mahalle-i mezbûre imâmı Mustafa Efendi b. Nasuh Efendi ve Abdülmümin Beşe b. Ahmed şehâdetleriyle sâbit ve sübût-ı vekâletine hükm-i şer‘î lâhık olan İbrahim Ağa b. Ali vekâleten hâzır olduğu halde meclis-i şer‘-i hatîr-ı lâzımü’t-tevkīrde bâ‘is-i hâze’r-rakīm Kömürcü Ohan v. Andriyas nâm zimmî muvâcehesinde ikrâr ve takrîr-i kelâm edip işbu keşif i‘lâmı mantûkunca mezbûr Kömürcü Ohan zimmî târîh-i kitâbdan on iki gün mukaddem mahalle-i mezbûrede vâki‘ menzilime girip zevcem müvekkile-i mezbûreyi hâmile iken bi-gayr-ı hakkın batnına eliyle darb etmekle darb-ı mezkûrdan müteessir[en] üç gün mürûrunda müvekkile-i mezbûre sekiz aylık mütebeyyinü’l-uzuv bir dişi meyyit ilkā etmeğin ben asâleten ve merkūm İbrahim Ağa vekâleten mûcib-i şer‘îsini mezbûr Ohan zimmîden taleb ve da‘vâ sadedinde olduğumuzda beynimizde muslihûn tavassut edip da‘vâ-yı mezkûremizden bizi mezbûr Ohan zimmî ile an-inkâr on beş guruş üzerine inşâ-i akd-i sulh eylediklerinde ben asâleten ve merkūm İbrahim Ağa vekâleten sulh-ı mezbûru kabûl ve bedel-i sulh olan meblağ-ı mezbûr on beş guruşu mezbûr Ohan zimmî yedinden bi’l-asâle ve bi’l-vekâle ahz u kabz edip husûs-ı mezbûra ve sâire müte‘allıka âmme-i de‘âvî ve kâffe-i mutâlebât ve eymândan mezbûr Ohan zimmînin [zimmetini] bi’l-asâle ve bi’l-vekâle ibrâ ve ıskāt eylediğimizde ol dahi bedel-i sulh-ı mezkûr on beş guruşa ve sâire müte‘allıka âmme-i de‘âvî ve muhâsamât ve kâffe-i mutâlebât ve eymândan benim ve zevcem müvekkile-i mesfûre Sofya’nın zimmetimizi ibrâ ve ıskāt eyledi dedikde vekîl-i merkūm İbrahim Ağa ve mezbûr Yorgi zimmî mukırr-ı mersûm Ohan zimmîyi cemî‘ takrîr-i meşrûhunda tahkīk ve tasdîk etmeleriyle mâ hüve’l-vâki‘ bi’t-taleb ketb olundu. Fî 24 min-Muharremi’l-harâm sene 1153. Şuhûdü’l-hâl: Mustafa Efendi el-imâm, Mehmed Efendi el-müezzin, İbrahim b. Mehmed, es-Seyyid Halil b. Ali, Abbas b. Hacı Mehmed, Ahmed b. Hüseyin, Ömer Beşe b. Bayram, el-Hâc İsmail b. Hasan Bey, Mustafa b. Hasan Bey, Kethüdâ Eyüb